Sunday School Saya/Sayama Hna Caah Cinken-awk

Cawnpiaktu: Stephen Hre Kio

  1. Zeicahdah Sunday School program hi kan ngeih i biataktein kan tuan?
    1. Kan Bawipa Jesuh nih a kan fialmi a si. (It is the command of our Lord Jesus Christ). Mat 28:19-20, “Cucaah khuazakip ah va kal ulaw miphun vialte kha ka zultu ah va ser hna u; Pa le Fapa le Thiang Thlarau min in tipilnak va pe hna ulaw, kan fialmi vialte hna hi an zulhnak hnga va cawnpiak hna u,” a ti.
    2. Baibal nih a kan chimh: (The Bible tells us so!) Phungthluk 22:6, “A zulh awk a simi lam kha ngakchia cu cawnpiak law, A upat tikah mah cucu a pialtak ti lai lo”.
    3. Cawnpiaktu si hi Pathian pekmi laksawng a si. (It is the gift of God to the Church).1 Kor 12:28, “Khrihfabu chungah Pathian nih an umnak hnga ding cio ah a chiah hna: A hmasabik ah lamkaltu, a pahnihnak ah profet pawl, a pathumnak ah cawnpiaktu, cun khuaruahhar a tuahtu, damtertu, bawmhnak pe khotu, … an si.”
    4. Kan khua le kan ramah bomh herhmi an tamtuk. (Our society needs help of teaching). Ca-uk ka relmi chungah, ngakchia tampi sianginn an kai lio zongah inn an ngei lo, an ti. USA ah ngakchia 100,000 nak tam “homeless” an si. Aho nih dah an cawnpiak hna?
    5. USA ram chungah nupa (marriage couples) 100 chungah 53 ani ṭhen. An faale an
      harbik, an ingbik. Kanmah Laimi lak zongah innchungkhar hi isiknak le iremlonak a tam. An faale hi ahonih dah an cawnpiak hna? Nan cawnpiakmi hna Sunday School ngakchia lakah zeizatdah hi bantuk harnak a tongmi an um? Midang cawnpiaktu ngei loin, nanmah Sunday School saya/sayama lawng hi an nung chungah cawnpiaktu nan si kho meen.

 

  1. Zeicahdah Baibal Cathiang hi kan cawnpiak hna? (Why do we use the Holy Bible for Sunday School teaching/curriculum?)
    Baibal nih a kan chimhmi a um: (The Bible itself gives us instruction).
    2 Timote 3:16-17, ah, “Cathiang hi a dihlak in Pathian thaw chuahhnawhmi a si i, biatak cawnpiaknak caah le palhnak cawnpiaknak alnak caah le palhmi remhnak caah le ding tein nunnak ding cawnpiaknak caah a ṭhahnemmi a si,” a ti.

 

  1. Sunday School Cawnpiaknak nih aa timhmi zeidah a si? (What is the purpose of Sunday School teaching? The purpose is not information, it is transformation).
    Sunday School cawnpiaknak hi an theih lomi theihter i zuam khi a si bik awk a si lo.
    Sunday School cawnpiaknak nih aa timh bikmi cu: Nun thlen a si! (It is not about information; it is about transformation of life! It is to obey the Lord’s teaching.) Kan Bawipa Jesuh nih, “Kaan fialmi vialte hna hi an zulhnak hnga va cawnpiak hna u,” a ti (Mat 28:20). An zulhnak hnga = to obey! Information theih le hngalh cu sianginn ah an cawn ko. Asinain nun thlen “transformation” cu sianginn nih an cawnpiak kho lo. SS lawngah nan ti khawh; cucaah SS saya/sayama hi nan biapi tuk. Khrihfabu nih a herh tukmi le a herh zungzalmi a si. Sunday school ngei lo Khrihfabu cu thlarau leiah a rawl a ṭam zungzal lai.

 

  1. Kan Cawnpiakmi Ngakchia hna hi:
    1. Ngakchia hi an chuah ka tein ahohmanh nih cawnpiak lo le chimh lo in ṭhang hna
      sehlaw minung ngaingai ah – nawl ngaimi minung ah – an i cang hnga lo. Kan Baibal Cathiang nih a timi hi hmaan dawh a si: Mi ṭha cia, cawnpiak hau loin, kan chuak lo!

      1. “Rinh awk tlak na si lo cu ka hngalh, Na chuahka in midohhmang na si cu ka hngalh” tiah Pathian nih a ti (Isa 48:8). (“You were called a rebel from birth”)
      2. “Sualnak cu mipa pakhat (Adam) thawngin vawlei cungah a tlung” (Rom 5:12).
      3. “Adam nih Pathian nawlbia a buarnak thawngin a tuahmi sualnak bantuk a tuah lomi zong kha a uk ko hna” (Rom 5:14).
    2. Ngakchia hi kum note an si lio in (kum 1-7 tiang) hi cawnpiak ṭhat lio caante a si; cu hnu ahcun an upat deuh hnu (kum 7 hnu) ahcun cawnpiak khawh an si tuk ti lo, ti a si. (Ngakchia lei mifim-mithiam child specialists nih an ti.)
    3. Ngakchia a no lio tein a cawnpiak khotu ding hi pahnih lawng an um:
      1. An nu le an pa;
      2. Sunday school saya/sayama. Church Pastor nih ngakchia hi kan cawnpiak kho hna lo. Caan kan pe kho lo. Nanmah SS saya/sayama hi ngakchia caah “Pastor” nan si. “Pastor” ti cu tukhaltu tican a si. Pathian min in khaaltu nan si.
    4. An nu le an pa nih an cawnpiak kho tuk hna lai lo; an i manh lo, cawnpiak zia zong an thiam lo. SS saya/sayama lawng hi cawnpiaktu taktak cu nan si men lai. Cucaah SS saya/sayama pawl hi nan biapi taktak!
    5. Thingkung kan ciin tikah, dingtein ṭhang seh, kan ti tikah thing a note kan ciin. Thli nih a chem tikah sawn kho lo dingin a dingmi tung ah hri neem in kan ṭeemcih i dingtein a kho. Cu bantuk cun ngakchia zong hi an si.
    6. Ngakchia cu phun tampi in an cawng: theihnak, hmuhnak, tuahnak . Tuahnak a biapi. “I hear, I forget; I see, I remember; I do, I understand” (phungthluk = maxim). “Ka theih i ka philh; ka hmuh i kaa cinken; ka tuah i ka hngalh,” tiah phungthluk a um. Baibal Cathiang zong nih a ti: “A bia kan theih paoh ahcun a za, tiah nanmah le nanmah i hleng len hlah u. A bia cu a tuah tu-in tuah deuh u,” a ti, (Zeim 1:22).

 

  1. Cawnpiaktu Saya/Sayama hna hi: An tlinh a haumi “qualification” a um.
    1. Khrihfa a si a hau – Bawipa Jesuh Khrih zumtu le a nawl ngaitu a si lai.
    2. Tipil ingcia a si awk a si. Church member a ṭhami a si awk a si fawn.
    3. A pum le a caan a pemi siseh. (Commitment is the key for a successful teacher.)
    4. Cawnpiak duhnak a ngeimi siseh; (interest in teaching). Cawnpiak a thiam lo zongah a cawn ahcun a thiam ko lai. (Skills are both taught and learned by practice.)
    5. Ngakchia a duhmi siseh. Ngakchia pakhat zong a cawnpiak khawh kha a biapi ngaingai.
    6. High School tal a cawng liomi siseh. Mirang holh he Lai holh he a thiam pahmi siseh.
    7. Mi dangdang (saya/sayama dang) he rinṭuanṭi duhnak thinlung a ngeimi siseh.
    8. Ngakchia hna cawnpiaktu si kho dingah Baibal Cathiang zaalak a thiammi siseh.
      (Hihi an thiam tuk lo zongah Pastor te nih kan cawnpiak khawh hna awk a si.)
    9. A rianṭuannak ah rinhchantlak sinak a ngeitu siseh. (Faithfulness in his/her work.)
    10. Sunday School cawnpiaknak rian ah “volunteer” ṭuan duhnak thinlung ngei seh.
    11. Sunday School cawnpiak hi caan tawite chung lawng ka ngei; zungzal in ka cawnpiak kho lai lo. Cucaah caan ka ngeihmi chungte ahhin ngakchia note pakhat tal Bawipa kehram ah phanhpi ning, ti thinlung ngeimi siseh. Hla kan sak tawnmi kha philh lo awk a si: “Vailamtah hram kan phakpimi thlarau vialte, Kan hmuhmi tuufa vialte hna hi;
      Kan suiluchin dawhtertu cu an si te lai, Cu sui khuapi dawh le nuam ahcun.
    12. Cawnpiaktu nih cun a cawn ve a hau zungzal. (Teachers must learn as well all the time.)

 

  1. Saya/Sayama nih SS ngakchia caah ruah-awk le tuah-awk a herhmi:
    1. Saya/sayama ṭha nih cun an ngakchia an cawnpiak hna tikah hmailei ah kalpi an i tim.
    2. Hmailei kalpi ding an si ahcun, atu an dirhmun an hngalh hna a hau.
    3. An cawnciami an hngalh lai i, cawnpiak dingmi zong kha an hngalh lai.
      (Hi kongah hin an cawndingmi (curriculum) kha a biapi. Hi cawndingmi hi Khrihfabu hruaitu hna nih an timhpiak ciami (ca-uk in maw, catlap in maw) a um cia awk a si.)
    4. Hmailei i nan kalpi hna tikah ngakchia pakhatte zong taantak-awk a si lai lo. Ngakchia nih an cawnmi a zulh kho hringhran lo a si ahcun a niam deuh khaan ah ṭhawn ding a si.
    5. Na ngakchia kha pakhat cio in an min hngal hna law, an herhbaunak theihpiak hna.
    6. Na ngakchia caah thlacam piak hna. Anmah he zong thlacam u. Pathian sinah ap hna!
    7. Nikhat ah Baibal caang pakhatte tal, biafang pakhatte tal, ciahter zungzal hna.
    8. Zeitik hmanh ah tlai hlah. Ngakchia nih an khaan i an rat tikah a rak dongtu si deuh.
    9. Ningcang ngeite in na ngakchia kha hruai khawh le cawnpiak khawh i zuam.
      Baibal Cathiang nih: “Pathian nih a kan auh cu ningcang lopi in um awkah si loin,
      daite in le remte in um awk tu ah a si” a ti, (1 Kor 14:33).

 

  1. Pakhat le pakhat i bawmh a hau:
    1. Khaan pakhat ah ngakchia 20 nak tam lo, a ṭha. 15 sisehlaw a ṭha deuh. 25 cu a tam tuk.
    2. Khaan pakhat ah Saya/sayama pakhat nih a tei lo ahcun a dang Saya nih bawm seh.
    3. Ngakchia lakah rinhchan tlak an um ahcun ngakchia deuh kha bawmtu ah a fial kho.
    4. Sunday School director a silo ah Pastor zong bawmhnak a hal awk a si.
    5. Bawmtu ṭhabik cu Pathian a si kha philh lo-awk a si.

 

  1. Sunday School rianṭuannak nih aa tinhmi Kawltung (goal):
    1. Pakhatnak i kan ṭial cang bangin ngakchia pakhatte ca zongah “nun thlen” kan i tim.
    2. Cu nunthlennak nih cun kan Khrihfabu a dawhter lai i, a ṭhanter, a ṭhawnter lai.
    3. Bawipa Thlacamnak (The Lord’s prayer) ah:
      “Na pennak cu rung tlung ko seh; Vancung ah na duhnak an tuah bang in,
      vawlei cungah tuah si ve seh” kan ti.
      Hiti kan cam hi, “Vawlei ah Pathian Pennak phan ko seh,” kan timi a si.
      SS ngakchia pakhat te nunnak ah “nunthlennak” a um kho ih “Bawipa duhnak a zulh kho” ahcun vawlei ahhin Pathian Pennak kan sak lengmang, tinak a si.
      Cu a satu lakah SS saya/sayama te hi nan i tel peng, tinak a si. Cutluk biapi nan si!

 

  1. SS Saya/sayama hna nih philh lo tein cinken awk a si zungzal mi cu:
    Khrihfabu chungah a kan hruaitu bik cu kan Pastor an si caah Sunday School rianṭuannak ah biaceihmi paohpaoh kha Pastor ruahnak hal le amah chimh hmasa kha a herh zungzal.
    Thla zong aan campiak hna lai.

October 31, 2014, Friday
Indiana Chin Baptist Church (ICBC)
Indianapolis, IN, USA