Khrihfa Fimcawnnak le Bank Phaisa Rawn Phun Fimcawnnak

Khrihfa Fimcawnnak le Bank Phaisa Rawn Phun Fimcawnnak
(Christian Education vs Banking Model of Education)
Lal Cung Awi


Zei thil poh a sullam (meaning) kan i fianning le a man (value) kan ngeihter ning nih kan tonghthamning le zohkhenhning zong lai a rel tawn. Cubantuk in, “Khrihfa Fimcawnnak (Christian Education) i a sullam kan i fianning nih Khrihfabu chung i fimcawnnak caah zeidah kan tuah, zeiruang ah dah kan tuah i, zeitin dah kan tuah… timi vialte zong a hruai i lai a rel,” tiah Khrihfa Fimcawnnak lei i thiamsang Professor Keren B. Tye nih a ti. Khrihfa Fimcawnnak he pehtlai in nihin Khrihfabu tampi ah: (1) Upa caah tuahmi Khrihfa Fimcawnnak (adult educational programs) biapi ah chiah lo nak, (2) Ngakchia Sunday School a dihkaa mino hna caah progam tuahpiakmi zeihmanh um lo nak, (3) Khrihfa Fimcawnnak lei ah cawnpiaktu ṭha ngeih a harnak (4) Pastor le Saya te hrimhrim nih Khrihfa Fimcawnnak lei ah thinlung (interest) ngeih lonak, (5) Nulepale le Sunday School ngakchia karlak ah theihpinak le i pehtlaihnak ngeihlonak, le (6) Khrihfa Fimcawnnak caah tuahmi programs le methods pawl Khrihfabu chung ah a herhning le aa tlak ning tein zulh le hman thiam lonak hna hi a tlangpi in tonmi harnak an si. Cu ruang ah, a hlei in America ram Protestant Khrihfabu hna i an fale High School siangngakchia hna cu cheuhra cheuthum lawnglawng Khrihfa Fimcawnnak he aa pehtlaimi an si cang, ti a si. Mino tam deuh cu Khrihfa zumhnak lei ah an ṭhan a pit. Cucaah, Khrihfabu le hruaitu upa kip nih Khrihfa Fimcawnnak hi biapi ah kan ruah chin lengmang i a hrihhram i kan kir ṭhan cio nak lai hi capar hi sawmtu ah kan ṭial.

Khrihfa Fimcawnnak ahhin a tlangpi in hrampi paruk (six basic building blocks for educational ministry) a um. Cu hna cu: (1) Ruahnak (Concept), (2) Hmuitinh (Purpose), (3) Pawngkam i a ummi thil/boruak (Context), (4) Cawn dingmi/chung-um (Content), (5) Aa telmi minung hna (Participants), le (6) Tuah ningcang (Process and method) an si. Ruahnak (Concept) he aa pehtlaimi biahalnak cu, “Khrihfa Fimcawnnak timi hi a sullam zeisat dah a si?” ti hi a si. Tinhmi (Purpose) nih, “Zeiruang ah dah Khrihfa Fimcawnnak hi kan herh?” ti biahalnak a ngeih ve. Pawngkam i a ummi thil/Boruak (context) nihcun, “Khrihfa Fimcawnnak caah zeibantuk hmunhma le pawngkam dah a biapi?” tiah bia a hal. Cawn dingmi/chung-um (Content) nihcun, “Zeidah kan cawn lai, zei kong dah kan herh bik?” ti biahalnak a ngeih ve. Cun, aa telmi minung hna (Participants) nih, “Hi cawnnak ah hodah aa tel?” ti le, Tuah-ning-cang (Process le method) nih, “Zeitindah kan tuah lai?,” “Zeibantuk method le thilri dah kan hman lai?” tiah bia an hal. A cunglei biahalnak hna hi ṭha tein kan ruah i a phi kan i chuah khawh ahcun, cu cu Khrihfa Fimcawnnak i a hrampi cu an si ko hnga. Hi biahalnak paruk chung in a biapi ngai ko tiah ka ruahmi langhter kaa zuam lai.

A luancia kum 50 chung vun cuanh tikah Kawlram cu Ralkap Cozah (dictatorship governments) nih hramhram in a uk mi ram a si, ti cu al awk ṭha lo tuanbia a si. Cucaah, cachimtu le siangngakchia i pehtlaihnak (teacher-student relationship) zong hi uktu le ukmi hna i pehtlaihnak (oppressor-oppressed relationship) phun deuh a si ve. Cu cu “cung-tang cawnning” (top-down learning) tiah auh a si. Hi bantuk cawnning ah cun cawnpiaktu nih a chim thluahmah i siangngakchia cu a ngaitu thilri pakhat bantuk lawng ah a cang. Fimcawnnak lei ah minthang ngai a si i Harvard University zong ah visiting professor, a hnu ah World Council of Churches zong ah Khrihfa Fimcawnnak lei Ruahnak-petu rian a ṭuan mi Brazil rammi Paulo Freire nih cun, “Hibantuk cung-tang cawnnak nihcun siangngakchia caah a hna-theih-mi icingchiah khawhnak thluak lawng a ngeihter caah a donghnak ahcun siangngakchia cu cachimtu nih rawnhchom lengmang haumi thil khumhnak kuang (container) ceo ah a cang. Tam deuh a rawn khotu paoh cu cachimtu thiam ah an cang i, tam deuh rawnh khawhmi paoh cu siangngakchia tha ah an cang ve” a ti. Mah bantuk cacawngning cu bank i phaisa va rawn (deposit va tuah) bantuk (banking model of education) a si. Cubantuk “Ba khaih in khaih cawnning” cu siangngakchia i a khuaruahnak ṭhanchonak caah dawnkhantu ngai a si. Paulo Freire nih, “Bank chung i phaisa kan rawn sawhsawh bantuk in rawnh mi a tam deuhdeuh tikah siangngakchia i chiaṭha thleidan khawhnak le khuaruah khawhnak a thluak a hrawhmi a tam deuhdeuh ve,” a ti.

Cu “ba khaih i khaih cawnning” he aa ralkahmi cawnning cu “Conscientization” ti a si i class chung ah siangngakchia nih zalong tein biahal khawhnak, a ruahnak chim khawhnak le, cachimtu le siangngakchia karlak ah zalong te le ṭihphannak ngei lo tein bia i ruah khawhnak (dialogue) ngei kho lak i tuah khi a si. Siangngakchia khua ruat kho lak i tuah le a lung hun pemter khi a si. Phundang i chim ahcun, siangngakchia cu a cohlangtu le bia-ngaitu bawm container (object) sawhsawh si ti lo in cacawnnak ah lungtho tein aa thlakmi (active participant or subject) a si cang. Hi kaphnih tonh (cachimtu le siangngakchia) cawnning nihhin siangngakchia nih a mah le mah aa hmuhning, midang a hmuh ning, a thluak khuaruahnak, a theihhngalh kauhnak, a thinlungput, pawngkam he pehtlaihnak, le biachim holhrel thiamnak lei tiang in ṭhanchonak nganpi a pek” tiah Laura Beark zong nih a ti. Hi cawnning hi Khrihfabu (Khrihfa Fimcawnnak) caah aa tlak khun. Zeicahtiah Bawi Jesuh hrimhrim nih hi cawnning hi a rak hman. Samaria nu he tikhor kam i an i ton lio ahkhan biaruah (dialogue) phun te in a rak cawnpiak i, cu nih cun minu a lung a rak thlen. Emmaus khua lei i khual a tlawng zultu pahnih hna zong Bawi Jesuh nih lamthlochuak bia a ruah hna i a donghnak ah an mit khua a hung dei, an lung a hung pem kha. Hi cawnning nihhin siangngakchia cu “Tuu,” “Thlaici,” “Khualtlawngmi,” “Cawng liomi,” le “Hawikom,” bantuk in a hmuh hna, tiah an ti.

Pathian zaangfahnak in America ram ah 2010 in 2014 kar kumli chung sianginn (M.Div. program) kainak caanṭha ka rak ngei ve. Hi sianginn ka kai chung ah kaa harh bik cem mi cu class chung ah bia hal le bia al, ruahnak chim le group discussion tuah (class participations) pawl khi an si. Kan Professor te nih bia an kan cah bikmi cu, “Anih nih cutin a chim… timi hi a biapi lo. Zeiruang ahdah cutin a chim… ti le, cu ruang ah kei nih cuticun ka ruah… timi tu hi a biapi,” ti lengmang a si. An lectures kaa fiang ko – ka thiam ko ka ti lai. Cun, cauk an kan reltermi zong ka rel hna i an sullam kaa fiang ko. Nain, keimah tein “a si maw si lo” ti i khuaruah khawhnak le ruahnak thar hun chuah khawhnak (critical and creative thinking) ah ka chambau ngaingai tawn. A ruang cu, ka hmet lio kum 5 ka tlin in kum 25 ka si tiang ca ka rak cawn tawn ning nih a ngeih caah a si. Kum 20 chung banking model of education in ka rak ṭhang. A tu hnu i hun i thlen ding cu ka caah a fawi ti lo. Cu bu ah, kaa chapmi tu cu a um ve ko tiah ka ruah. Sianginn ka kai lai ah kaa ruahchihmi cu Khrihfabu caah chim ding le cawnpiak ding tampi in ka cawn lai i Khrihfabu ka phorh hna lai ti khi a si. Kum li ka hung kai taktak tikah ka ruah ning bantuk in a si lo. Keimah tu a ka thlen tiah ka ruah. Ka khuaruahning le ka thil hmuh ning aa thleng. A bik in, midang ka hmuh hna ning aa thleng. Cuti ka ti tik ah, sianginn pakhat nih an zumhnak an kan rawnh i kan thluak an kan ṭawl (brain-wash) phun khi a si lo. Zalonnak le duhthimnak tlamtling tein pekmi chung i a hung chuakmi ṭhannak a si ti in ka hmuh.

Hlan lio chan ahcun sianginn (school) a rak um lo. Cucaah, sianginn (school) biafang hrimhrim zong Baibal ah aa tel lo nak a si (English version cheukhat ahcun hmunkhat te, Lam 19:9 ah a lang). Cu bang in, “Sunday School” a hung umnak hi cu nai te 1780s hrawng lawng ah a si. Khrihfa Fimcawnnak kong tu cu Biakam Hlun ah siseh Biakam Thar ah siseh hmun tampi ah hmuh khawh a si. Bawi Jesuh hrimhrim kha, mi khamhtu a si bu ah, cawnpiaktu ṭha bik a rak si i cawnpiaktu hna cawnpiaktu (trainer of teachers) zong a rak si. Synagogue chung ah, tlang cung ah, nelrawl ah, inn ah, rawldanghnak ah, lawng cung ah, lo ah, lam ah ti in a hmun le a caan hoih in a rak cawnpiak tawn hna. Cuti Bawi Jesuh, cawnpiaktu ṭha bik a si nak khun cu a cawnpiaknak kip ah luatnak (liberation) a um hi a si. Hri le hreng in ṭemṭawn a si mi vialte, a cawnpiaknak nih luatnak le zalonnak a pek tawn hna. Anne E. Wimberly nih, “Khrihfa Fimchimhnak i aa tinhmi cu: Baibal chan in nihinni tiang Pathian nih luatnnak rian a ṭuannak le Jesuh Khrih muisam keng ding i a kan kawhnak kong midang nih an i fian khawhnak hnga caah va bawmh khi a si” tiah a ti. Cu cu Khrihfa Fimcawnnak (Christian Education) nih aa tinh bik mi a si. Khoika hmun hmanh si ai kun, Khrihfa Fimcawnnak taktak nih cun siangngakchia caah zalong te i bia-ngaih khawhnak, chimrel khawh nak, ṭial khawhnak, tuaktan khawhnak, zumh khawhnak, le duh thim khawhnak a pek. Sianginn le Sunday School class rooms chung ah siangngakchia ṭhutter i a ciasa-theihhngalhnak (ready-made knowledge) rawnh vial lawng cu fimcawnnak taktak a rak si lo.

Cherhchan cauk (Bibliography)
1. Tye, Karen. Basics of Christian Education. St. Louis: Chalice Press. 2000
2. Winberly, Anne. Soul Stories. Nashville: Abingdon Press. 2004
3. Berk, Laura E. Children’s Minds. Oxford University Press. 2001

 Khrihfa Fimcawnnak le Bank Phaisa Rawn