Khrihfa Upa le A Rian

Rev. Dr. Stehen Hre Kio

Khrihfabu hi a nungmi Bu, Jesuh Khrih nih a thisen in a tlenhmi, Amah taksa ruangpi tiah min pekmi Bu, kan Bawipa Jesuh nih a Thlarau in a umpimi Bu, a si. Cu Bu cu vawlei cungah daite i um loin zarhtin le nitin Pathian a biami le aa pummi le thla a cammi le a cawlcaangmi a si. An Bawipa Jesuh Khrih min in a nungmi le khua a sami an si; Amah caah tette an si.  Hiti an um hi an Bawipa nih a fialmi hna le bia a kamhmi hna an zulh caah a si. A fialmi hna le a kamhmi hna cu hitiin a si: (Mat 28:19-20)
Vawlei cung khuazakip ah va kal ulaw miphun vialte kha a ka zultu va siter hna u,
Pa le Fapa le Thiang Thlarau min in tipilnak va pe hna u,
Kan fialmi vialte hna hi an zulhnak hnga va cawnpiak hna u,
Hihi philh hlah u: Nan sinah a zungzal in, caan dongh tiang in, ka um lai, a ti hna.

Culawng si loin hmasabik Khrihfa hna nih an tuah tawnmi kha atu zongah tuah an duh rih. Hmasabik Khrihfa hna nih an tuahmi cu: (Lam 2:41-42)
Mi tampi nih a (Piter) bia cu an zumh i tipilnak kha an in…
Lamkaltu cawnpiaknak kha ngaih awkah khan atu le tu ani pum,
Hawikomhnak ah khan ani tel i hawikomhnak rawl kha an dum ṭi,
Thla an cam lengmang.

Cu an zulhmi an zumhning phung cu, an Bawipa ih a thokmi Bu chung ah cun, nihin ni tiang an zulh peng rih ko. Khrihfa nun cu cutin a si zungzal.Voikhat cu Kampani i upa lawngte Senior Club ah (CEO lawngte) meeting an ngei. An chairman nih: Aho company dah saubik a um cangmi nan si? tiah a hal hna. A cheu nih kan Kampani cu kum 50 a si cang, an ti. A cheu nih kum 100 a si cang, an ti. A cheu nih kum 10 a si, an ti. Cu hna lakah cun Pastor pakhat (Bishop pakhat) aa tel ve i “Kei ka Kampani cu Jesuh Khrih le Amah zultu hna nih an thokmi a si i, kum 2000 dengmang a si cang” a ti hna. Cucu upa tampi nih an ruah tikah a hmaan ngai, tiah an ruah. Khrihfabu hi kum 2000 a nung cangmi Kampani a si. Pathian – Bawi Jesuh Khrih – Company a si.Cu an Bawipa nih a derhmi Bu chungah cun, mithmai a langbik le ṭuanvo zong tambik a ngeimi cu Khrihfabu hruaitu Pastor le Upa an si. Hi Pastor le Upa hna hi Khrihfabu chung lawngah an langbik si loin, leikhawvel mi hmai zongah a langmi le awka a ngei vemi an si fawn. Cucaah hi Pastor le Upa hna hi an hmurka lawng si loin an ziaza le an nunning zongin zohchun-awk le hmaizah-awk tlak an si kha a hau ngai. Zochun-awk tlak an si lo ahcun an Bawipa mithmai chiattertu an si. Zohchun-awk tlak an si ahcun an Bawipa mithmai ṭhattertu an si ve.

Kan hnulei kum 15-25 chungah, USA ahhin, TV phungchimtu le Biakinn nganpipi i hruaitu Pastor hna nih an chimmi bantuk i nung loin vawlei nun cawng in (nu lei ah minchia in) an um caah Khrihfabu mithmai dawhlotertu le kan Bawipa min chiattertu ah an cang. Roman Catholic Priests nih mino deuh (a tam bik cu pa) an sualpi hna caah hi nih hin an Khrihfabu hmai a chiatter ngai. Cu nih cun kan Bawipa min a chiatter ngaingai fawn, zumlotu hna boruak hrimhrim ahcun!  Hi nih hin a langhtermi cu: Khrihfabu hruaitu hna nih i ralrin a hau ngaingai tinak a si. Kan Bawipa Jesuh nih bianabia a chim tikah thlaikho lakah belh a kho ve, ti bia a chim. “Thlaici ṭha a vorhtu cu Mi Fapa a si; belh ci a tuhtu kan ral cu Satan a si i, belh cu mi Ṭhalopa minung an si” a ti (Mat 13:36-43). Kan Khrihfabu chungah hin thlaici ṭha an um bangin belh a tuhtu Satan i minung cu an um zungzal ve ko lai. Mi Fapa nih thlaici a vorhmi (zumtu hna) a cawngtu le a khaltu cu Pastor le Upa an si. Thlaici ṭha he, belh he a kho ṭimi Bu chungah khaaltu si hi a fawi lo ngai. Pathian zumtu hna congh le hramh hi ṭuanvo har ngaingai a si i, a sunglawi ngaingai mi rian zong a si fawn. Bawipa min chiatterlotu si awk kha a biapi ngaingai. Hi bantuk rian hi i khinh awkah ciamciam tein ruah le i timhlamh ngai a hau. Ṭuan tikah i ralrin ngai zong a hau fawn.

Elder/Pastor

Khrihfa Upa (Deacons) kong kan zoh hlanah Pastor/Elder kong zeitindah Khrihfabu chungah aa thok, ti hi zohta ah a ṭha. Paul nih Pastor le Khrihfa Upa kong 1 Timote 3:1-13 chung ah aa changchang tein Pastor le Upa kong a ṭial. Pastor kong a ṭial hmasa i Upa kong nih a zulh. Paul nih Khrihfabu nunnak caah cun Pastor hi biapi deuh ah a chiah zungzal. Biakam Thar (Baibal) chungah Elder kong kan hmuh hmasabik nak cu Lamkaltu cauk chungah a si. Paul le Barnabas nih Thawngṭhabia chim in khual an tlawn lengmang nakah, “Khrihfabu kip ah khan Khrihfa Upa an chiah hna i thlacamnak le rawl-ulhnak he ani bochanmi Bawipa kut chungah khan an chiah hna” ti kan hmuh (Lam 14:21-23). Hika i Khrihfa Upa tiah lehmi hi Grik in presbyterous ti a si i, Khrihfabu hruaitu an si caah Hruaitu/Pastor ti in leh ah a ṭha deuh. Mirang Baibal a cheu (tam deuh) nih cun Elders tiah an leh i, Khrihfabu ah ṭuanvo ngeitu bik ti awk a si. Cu presbyterous – Elder cu Pastor/Hruaitu ti ih leh mi a si. Cuti cun Elders/Pastor/Hruaitu hna cu an thim hna i, rian an pek hna tikah “thlacamnak le rawl-ulhnak” ngei in “rianpek” “riankhinh” cu an tuahmi a si. “Ordination pek” ti a si kho.  (Mirang in appoint, install, ordain ti a si kho).Paul le Barnabas nih “Khrihfabu kip ah Elder an chiah hna” lawng a si lo. Paul nih Krit tikulh ah Titas a chiahtak tikah a fialmi cu: (Titas 1:5)
Krit tikulh i kan chiahtak tikah khan ka rak i tinhmi cu, kan ṭuannak i kan nganhtami kha
a ningcangte in na hun sersiam hna lai i khua kipah Elder (presbyterous=Pastor/hruaitu)

kha na hun chiah hna lai, ti a si” a ti.Hlanlio Khrihfabu ahhin khuakip ah Elder (presbyterous = Pastor) an chiah phung deuh a si. Tuchan i khuakip ah Pastor kan chiah bantuk hi a si ve ko. Khuakip ah Elder cu hruaitu – Khrihfabu hruaitu an si. Hmasabik Khrihfabu ahcun “Khrihfa Upa” deacons (diakonos) cu khuakip ah an chia lo; Elder (Pastor) in tavuan a lak dih. Hiti Elder an chiah hna hi Judah mi nih Sinakok i an tuah tawnmi an cawn caah. Sinakok ahcun hruaitu pakhat nih a hohat hna.

Hi Elders/Pastor/Hruaitu an thim hna tikah mifim mithiam an si caah a si lo; mirum minung khoan si ca zongah a si lo; phaisa leiah rinhchan-awk tlak an si caah a si fawn lo. Pathian nih a thimhna tiah an zumh hna caah an thimmi hna an si. Pathian nih a thim hna caah thlarau lei kongkau ah siseh, fimnak le thiamnak lei zongah siseh, rinhchan tlak minung ah an cang. Pathian nih Amah minung i a thimmi hna cu hmantlak hriamhrei a pek ve ko hna.

 

Deacon/Khrihfa Upa

Judah mi nih an Sinakok (an thlacamnak inn) i an tuah bal lomi kha Khrihfabu nih an tuah. Cucu Khrihfabu nih Khrihfa Upa (Deacons) an chiah hna hi a si. Judah mi hna nih an Sinakok ah “Khrihfa Upa” (deacon) hi an chia bal lo nain a herhnak an hmuh caah an chiahmi a si. Lamkaltu hna (Apostles) nih Pathian rianṭuannak caah a herhmi an hmu caah an chiahmi a si. A chiatu hi Lamkaltu (Apostles) an si. Cuti an chiahmi cu “Khrihfa Upa” – (Mirang in deacon, Grik in diakonos) an timi a si. Diakonos ti cu Grik holh a si i a hrihhram cu diakoneo an ti i, “ṭuan” (verb) “to serve” ti ding a si; diakonia ti cu noun a si i “rianṭuan” (service) ti ding a si. A ṭuantu cu “servants” (diakonos) Khrihfa Upa (Ṭuantu) ti ding khi an si. Culio ahcun cabuai i rianṭuan khi a si bik. Johan 2:5, ah, “Jesuh nu nih cun sinum pawl (diakonois = servants) cu ‘An chimhmi hna paoh kha tuah te u,’ tiah a ti hna” ti kan hmuh. Mibupi rawl-einak i “kawi” rianṭuantu khi an si.
Cucu “diakonos” an ti hna.“Khrihfa Upa” hmasabik kan hmuhnak cu Lamkaltu 6 chungah a si. Lam 6:1-4, chungah a um; asinain a min “diakonos” ti an hmang rih lo. “Pasarih” (the seven) an ti hna.
Zumtu an karh chin lengmang tikah Grik holh hmangmi Judah mi hna le Judah holh a
hmangmi  Judah mi hna karlakah khan siknak a um. Grik holh a hmangmi Judah mi hna
nih khan kannih kan nuhmei hna cu ni fate thil i phawtnak ah khan hrelh deuh an si,
tiah an zai…. Cucaah Lamkaltu hleihnih hna nih khan zultu dihlak kha an kawh hna i,
“Kannih nih Pathian bia chim kha thlahdorh riangmang in tangka i phawtnak kong lawng
kha kan tuah ahcun a hmaan hnga lo. Cucaah ulenau hna, nan lakah Thiang Thlarau le
fimnak in a khat tiah nan hngalhmi pasarih in thim hna ulaw, cu hna cu hi thil a tawlreltu
ah kan thiah hna lai. Kannih tu cu thlacam le Pathian Bia chimnak ah khan kan caan cu a
dihlak in kan hmang ko lai,” tiah an ti hna.

Hi Baibal caang chungah “diakonos” – Khrihfa Upa ti cu a um lo nain an ṭuanmi cu diakonos rian a si. An tuahmi hi a biapi ngaingai. A biapitnak pathumli kan langhter:
(i)  Khrihfabu nih harnak an tonmi kha – i siknak kha – remnak tuah awkah rian an ngei;
(ii) Judah holh a hmangmi Judah mi le Grik holh a hmangmi Judah mi ani remlonak an remh;
(iii) Thilri phawtmi an comi kha aazat cio tein an co awk kha an ṭuanvo cu a si.
(iv) An remh kho ahcun Khrihfabu ani rem lai i an ṭhangcho lai; an remh kho lo ahcun Khrihfabu harnak an tong lai. Vawlei thilri kong a si nain thlarau lei ah sullam tampi ngeimi a si.Hi bantuk vawlei thilri kongah tawlrelnak hi Deacon (diakonos) nih an tuah tikah cu lawng cu an rian a si lo. Kum le caan a hung rauh deuh i Khrihfabu an tam chin lengmang tikah diakonos pawl cu an rian hi duhsahtein aa thleng pah. Cu aa thlengmi cu Paul nih Timote sin ah le Titas sin ah ca a ṭialmi ah kan hmuh khawh. Hlanlio Khrihfabu hi ningcang deuh le pungsan ngei in (church structure) a tawlreltu bik Paul a si. Judah biaknak lei i hotu pakhat a si lawng si loin    pungsan ngei in Khrihfa a chiahnak kan hmuh khawh. 1 Timote 3:8-13 chungah tlingtein a ṭialmi kan hmuh; diakonos hna sining ding le an rian a ṭialmi a si. Cun 1 Timote 3:1-7, ah Pastor/Hruaitu hna sining le an rian a ṭial hmasa hnu ah diakonos sining le an rianṭuan dingmi a ṭial. {Pastor/Hruaitu hi Paul nih min thar a bunh: Elder (Presbyteros) si ti loin Bishop, (episkopos) tiah min thar a sak. Hihi kannih Baptist pomning ahcun Bishop kan ti lo; asinain Pastor/Hruaitu kan timi he hin aa khat ko, tiah ruah a si.}  Paul nih diakonos sining le an rian cu hiti hin a ṭial: (1 Tim 3:8-13)            “Khrihfa Upa hna zong ziaza a ṭhami le lungthin a thiangmi an si lai;
Zu tamtuk a dingmi an si lai lo i hakkaumi zong an si lai lo.
Phuanmi zumhnak biatak cu an chia le ṭha thleidan nak lungthin in fektein aa tlaih mi an
si lai. Annih cu hneksak hmasa an si lai i an awn ahcun an ṭuan lai.
An nupi le zong ziaza ṭhami an si lai i mi congoih hmangmi an si lai lo;
Zurit hmang lomi an si lai i zeizong kipah midingmi an si lai.
Khrihfa Upa cu nupi pakhat lawng ngeimi an si lai i,
An fale hna le an innchungkhar kha ṭhatein a zohkhenh khomi an si lai.
Rian ṭha a ṭuanmi Khrihfa Upa cu hmaizahnak an hmu i,
Khrih Jesuh an zumhnak kong kha ralṭha in an chim ngam lai.”

Khrihfa Upa rianṭuannak kongah hin a biapimi pahnih thum a um: A bikin ziaza kong le a zumhnak kong a si. A ziaza ah zohchunh tlak sisehlaw, a zumhnak ah rinhchantlak siseh, ti a si bik. Ziaza:  Ziaza kongah hin “lungthin thiangmi” ti a um. A thiangmi Pathian rian an ṭuan caah an lungthin le an tuahmi zongah a thian cu a hau. Lungthin le ziaza thiang lo caah Pathian rianṭuan hi a har ngaingai. Pathian lamhruainak an tong lo kho. “Zu tamtuk a dingmi a si lai lo” ti hi tlawmte cu din a ngah ko, ti a lo. Culio ahcun tuchan i zu kan timi bantuk a um rih lo. Hlanlio ahcun tithiang din-awk a har ngaingai. A thiangmi cu mitsur hang saupi an chiah i, a “tho” cangmi khi a si bik. Cucu tampi din ahcun rit khawh a si. Tampi din i rit kha Paul i a khammi hi a si. A tawkzawn le ningcang te i mitsur “zu” din kha a khammi a si lo. A kham ahcun tithiang din ding ngei lo i um a fawite; tithur din cu damlonak hna a cang kho. Damlo i um cu Pathian duhmi zong a si lo.

“An nupi le zong ziaza ṭhami an si lai” timi hi zumtu cheukhat nih, “Nu Khrihfa Upa zong ziaza ṭhami an si lai” ti a chim duhmi a si, tiah an zumh. Grik ah “an nupi” tiah fiangtein um loin, “nu” ti lawng in a um (Grik in gunaikos timi a si i, “nu” ti lawng in lak khawh a si.) Cucaah “Nu Upa” – Nu Khrihfa Upa – ti i a lami an umnak cu a si. Hihi a hmaan kho ngaimi a si. Cucaah Nu Khrihfa Upa ngeih khawhnak lam a um, ti khawh a si. Cun Paul nih Rom 16:1 ah, “Khrihfabu chung i rianṭuantu” (servant = diakonos), kan farnu Fibi (Phoebe) kha ṭhatein rak zoh u,” tiah bia a cah hna. Nu nih Khrihfa Upa rianṭuan hi kan Baibal Cathiang nih lam a onh ko, tiah ruah awk a si.  “Khrihfa Upa cu nupi pakhat lawng ngeimi an si lai” ti hi “Khrihfa Upa cu nupi voikhat lawng a ṭhimi a si lai” tiah zong in lak khawh a si, Grik umtu ning ahcun. Sihmanhselaw Baibal thiam tam deuh nih, “Nupi pakhat lawng a ngeimi” ti deuh awk a si, an ti. Hlanlio zongah cuti cun a sullam an lak i, tuchan Baibal thiam le a lettu hna tambik zong nih cuti cun an pomning a si. Zumhnak: “Phuanmi zumhnak biatak cu an chia le ṭha thleidan nak lungthin in fektein aa tlaih mi an  si lai” tile “Annih cu hneksak hmasa an si lai i an awn ahcun an ṭuan lai” timi hi aa pehmi an si. Zumhnak kongah cun “lungthin taktein an zumhnak aa tlaihmi si hnaseh” ti le “hneksak ciami si hnaseh” ti hi zumhnak kongah fektein i tlaih a herhnak kong, a chimmi a si. A zumhnak ah a tlusawn lengmang mi Upa cu Khrihfa Upa ṭuan tlak a si lo, ti duhnak a si.

Paul nih Timote sin i a ṭialmi ahhin ruah-awk ngai pahnih thum a um rih mi cu: Pastor sining le rian kong a ṭial tikah, le Khrihfa Upa sining le rian kong a ṭial tikah aa khatmi an um:
Pakhatnak cu, “Pastor cu soiselnak ngei lomi si hnaseh” a ti, (1 Tim 3:2); “Khrihfabu leng zongah upat tlak si hnaseh,” ti a um, (3:7). Khrihfa Upa zong, “Upa cu upat tlak si hnaseh” ti a um, (3:8); “ṭhatein an ṭuan ahcun an dirhmun a ṭha” ti zong a um (3:13). Pahnihnak cu  tangka kong a si. “Pastor cu phaisa duhtu si hlahseh” ti a um (1 Tim 3:4-5). Phaisa duhtuktu si hlahseh, tican a si. Pastor nih Pathian rian a ṭuan tikah lahkhah zoh in ṭuanlo-awk kha a biapi ngaingai. Cabangin Khrihfabu Upa kong zongah a um ve: Upa nih, “a hmaan loin miaknak kawl hlahseh,” ti a um (1 Tim 3:8b). Pathumnak cu innchungkhar le Khrihfabu hruainak kongah a si; ani khahnak a um nain ani dannak zong a um ve. Pastor cu a “innchungkhar ṭhatein a zohkhenh khotu le a hruai khotu a si lai; a faale hna cu mi upatnak pek thiammi an si lai,” ti a um (1 Tim 3:4). Cun, “A innchungkhar ṭhatein a hruai kholo ahcun zeitindah Pathian Khrihfabu cu a hruai khawh lai,?” ti a um rih (3:5). Cubangtukin Khrihfa Upa kong zongah a um ve: Khrihfa Upa cu “a fale hna le an innchungkhar kha ṭhatein a zohkhenh khomi a si lai,” ti a um (3:12). Asinain, “Culo ahcun zeitindah Pathian Khrihfabu cu a zohkhenh, a hruai khawh hna lai” timi a um lo. Hihi Paul nih, Pastor cu Pathian Khrihfabu hruaitu (management tuahtu) a si i, Khrihfabu Upa cu a si lo, ti a chim duhmi a si, tiah ruattu tampi a um. Tuchan Khrihfabu ah Khrihfa Upa nih “management” a dihlak in an lak dih i, Pastor cu rian fial tik lawng i ṭuantu ah a tuahtu Khrihfabu tampi an um hi, a dik lo in a hmaan lo kho.  Sihmanhselaw Paul nih Timote cakuat (1 Tim 3:1-13) chungah Pastor sining le rianṭuanning a ṭial i, Khrihfa Upa sining le rianṭuanning a ṭial chih tikah, hmun khatte i, aa changchang in, a ṭialning kan zoh tikah, hmunkhat  i rianṭuantu si dingah Paul i cawnpiaknak hi a si, tiah pomtlak a si. Paul nih Titas sin ca a kuat tikah cun Khrihfabu chung rianṭuantu ahcun Elder/Pastor/Hruaitu i sining le a ṭuan ding ṭuanvo kong tampi a ṭial (Titas 1:5-9). Paul nih Efesa Khrihabu sinah, Pastor/Hruaitu cu “Thiang Thlarau nih Khrihfabu zohkhenhtu ah aan tuah” a ti; “Pathian Khrihfabu khaaltu si ko” a ti (Lam 20:28). Citicun Piter zong nih a ṭial (1 Pit 5:1-2). Khrihfa Upa sining le ṭuanmi a ṭial ti lo. Sihmanhsehlaw hi nih hin Khrihfa Upa rian a herh lo tinak a um lo; Pastor he rianṭuanṭi si-awk hi a tlangpi in cun Baibal i cawnpiaknak hi a si, tiah Timote sin i a ṭialmi hin kan hmuh. Cun chankhat hnu chankhat Khrihfabu chung i rianṭuannak kongah Khrihfabu nih Khrihfa Upa cu an chiah zungzal. Rom khua Khrihfabu hna nih cun Khrihfa Upa hi “pasarih” in an chiah zungzal. “Pasarih” hi AD 1500 tiang an zulh tawn mi a si. Khrihfabu Remhnak (Reformatiion) hnu lawngin “pasarih” lawng si tiloin “hleihnih” hi an zulh deuhmi a si. Tuchan ahcun “hleihnih” lawng  hmanh a za ti lo. Cu-nak tam zong Khrifabu tampi nih an chiah hna. Baibal cawnpiaknak a um caah an chiah mi a si zungzal.Khrihfa Upa rianṭuannak ca-uk kan rel tikah “Pastor cu Khrihfabu hruaitu an si i, Khrihfab Upa cu bawmtu an si” ti a si zungzal. Hihi thildawh le a ṭhami a si ko. “Now that You’re a DEACON ti cauk a ṭialtu minthang Howard B. Foshee nih cun, “The heritage of deacon service goes back to the New Testament time. Pastors and deacons have served as brothers in ministry through the centuries” a ti (p. 10). Laiholh cun: Chan tampi chungah Pastor le Khrihfa Upa hi unau bangin an ṭuanṭi zungzal; Biakam Thar cauk chan in aa thok cangmi a si, a ti. “Unau bangin an ṭuanṭi” ti hi a biapi bikmi a si. Bawlung chuih i “team khat” i an ṭan tawn bantuk in Pastor le Upa hi “team khat” in dir le ṭuan a hau. Hiti an ṭuan khawh tikah Pathian thluachuahnak an dong. Biakam Thar chungah kan rel: Cuti an ṭuan caah, “Pathian Bia a karh i, Jerusalem ah zultu an tam chin lengmang. Tlangbawi hna zong a bu a bu in an lut i, zumtu ah an cang lengmang,” ti kan hmuh (Lam 6:7). Pastor le Upa “unau” bang an ṭuanṭinak hmun ah ṭhanchonak a um tawn; an ṭuanti lonak hmun ah cun Khrihfabu harnak an tong i, an milu an ṭhan hmanh ah zumhnak ah an ṭhang kho lai lo. Team khat an si caah pakhat le pakhat i-bawm hnaseh; i-upat hnaseh; thla i-campiak veve hnasehlaw i-daw ngai hnaseh. Paul nih amah he rianṭuanmi hna kongah bia a chimmi cu: “For we are partners working together for God” a ti (1 Cor 3:9, TEV). “Pathian rian ah ṭuanṭi kan si” tinak a si.  Pathian min in dawtnak he rianṭuantinak ahcun Pathian a um zungzal.
Khrihfa Upa Rianṭuannak A BiapiVawlei cung i Missionary minthang, “Pioneer Chinna Inland Mission” thoktu Hudson Taylor nih a chimmi bia hi Khrifabu chung rianṭuantu poah nih i lak ṭha a si:
Pathian thimmi hmun ah Pathian minung si uh,
Pathian duhning tein Pathian rianṭuan uh, a ti.
Khrihfabu Upa rianṭuan hi mah i ithimmi zong a si bal lo. Khrihfabu nih thimmi a si ṭheu ko. Cuti kan ṭuannak hmun hi Pathian i thimpiakmi hmun ah ruah awk a si. “Pathian duhningtein ṭuan awk” hi Baibal Cathiang nih a kan cawnpiakmi kan cawn lengmangmi hi a si. USA tuanbia ah minthangbik pakhat cu an President hmasabik George Washington a si. USA President ṭum hnih a ṭuan (1789-1797). England in luatawk ah “Revolutionary War” (1775-1783) a um i, England he ani doh lioah an ralbawi hotubik General a rak si. USA ram hi Independence a hmu lai maw? Hmu lo dah? tihi a fian rih lolio caan a si. Cuaithlainak (scale) in aa thlai liopi a si. Culio ah George Washington nih a chimmi hi tuchan Pastor le Upa hna caah ruahawk ṭha a si:
Hmailei caan ah a chuak rih laimi minung million tampi nunnak cu,
Pathian hruainak tangah, nanmah ralkap ralṭhat le ziaza parah aa ṭhum;
Kan Ram minṭhat-minchaitnak ding nih hin kan nunnak kan thazaang dihlak
chuah awkah a kan fial.
Ningzak mualpho in kan doh ahcun vawlei khuazakip ah kan thang a chia lai;
Ralkap pakhat cio daitein um uhlaw hruaitu nawlpeknak hi ngai uh;
Order ngai ulaw, ral pakhat ka kahthat lai ti na fian lawngah na meithal cun kap, a ti.Kan Khrihfabu hmailei an lamkalnak caah hin atu i hruaitu upa hna hi nan biapi ngaingai. Laimi (Chinmi) hmailei caan saupi ah USA ahhin kan min a chia laimaw? a ṭha laid ah? ti cu atu namah parah hin aa ṭhum. Daithlang in kan kan ṭuan awk a si lo; atu caan lawng hi caan kan ngei; Upa rianṭuan zong hi i-nolh lengmang khawh zong a si lo. Mi pakhat sin i na biachimmi le mi na bomhnak nih hin hmailei kan chan saupi caah lamsialtu an si lai. Mi pakhat “Pathian bia in na kah” hi a biapi ngaingai. Na kah lo zong hi a biapi ngai fawn.Khrihfa Upa hi Bu khatkhat ahcun “ordination” an pek hna, Pastor bawmtu ah. Cubantuk “ordination” cu Baptist nih kan tuah lo nain Khrihfa Upa caah “thlacamnak” kan tuah cu a biapi ngaimi a si. Pathian ca le Bu caah a dangtein chiahmi nan si, ti duhnak a si. Cubantuk “ordination” caan ah hruaitup pakhat, USA ah, Otis Bardwell nih a chimmi cu:
Deacon timi hi upat peknak ah Deacon i kan tuah a si lo, upattlak a si ko nain;
Deacon timi cu rianṭuantu (diakonos) a si bantukin,
Pathian le Khrihfabu rianṭuantu (servants) si dingah a hleitein chiahmi an si.
Deacon cu ṭuantu (diakonos) ah fialmi an si.
Zumhnak le bochantlak sinak le dawtnak ah zohchuntlak a si lai, a ti.Khrihfa Upa cu Bu chung i bomh herhmi hna bawmtu bik an si. “Deacons serve as persons who care”, (Foshee, p 15). Kan vawlei hi bomh hermi lawngte an si. Vawlei cung nunnak caah bomh herhmi, phaisa lei in bomh herhmi, thlarau lei caah bomh herhmi, zumhnak caah bomh herhmi, minung pakhat le pakhat aa rem lomi hna caah bomh herhmi, damlonak caah bomh herhmi – bomh herhmi lawngte kan si. Cucu Pastor nakin Upa nih an tlinh khawh deuh. Pastor cu rian dangdang ah an thazaang le an caan tamtuk a kal.  Khrihfa Upa cu Pastor nakin minung tampi deuh an si caah tlawmte cio an ṭuan tik hmanhah tampi ṭuan bantuk a si. Khrihfa Upa caah cun Khrihfabu chung i herhmi vialte zohtu le bawmtu an si kha a biapi ngaingai. Midang nih kan ti khawh lomi, ti awkah thimnak zong a co lomi, an si i, a titu ding le a tikhotu cu Deacons an si. Khrihfa Upa hna cu Khrihfabu bu khatte i um ding a ṭuantu bik an si leng ah, tuu a khaltu zong an si ve: an herhnak paoh ah mi bawmtu si khal tuukhal rian cu a si ko. Bawmtu rian an ṭuan lo ahcun Upa rian an ṭuan lo tinak a si. Khrihfa Upa hi anmah le an umnak zawn (an sang) cioah Khrihfa inn cio kha ṭuanvo pekah a ṭha bik.  Khrihfabu inn cazin zoh in i phawt chun awkah a ṭha. Bu cazin inn a tam ahcun Upa tam deuh beet awk an si. Khrihfa Upa cu Zaanghleicawitu an si. Cuti i zaanghlei an cawi caah upattlak an sinak cu a si bik. Khrihfa Upa nih zarh khat ah inn khatte leng kho sehlaw, thla khat ah inn li, a leng lai i, kum khat ahcun inn 48 ah a leng lai. Khrihfa Upa pakua hra an si tikah cun inn tampi – Khrihfabu tampi – an leen khawh hna, tinak a si. Khrihfabu chungah Pastor cu ruattubik an si i, Khrihfabu Upa cu ṭuantubik an si. Bu chungah hin “ruattu” lawng hi a za lo; “ṭuantu” um a hau. Cun “ṭuantu” lawng in a za ve lo; “ruattu” um a hau ngai ve. Ṭuan lo ahcun ruah lawng cu a thi! “The primary duty of a deacon is to be in touch with church members”. Cu member (chungtel) he i-pehtlaih khawh peng cu Deacon rianṭuan ah a biapi ngaimi a si.Khrihfa Upa hi anmah le an pawcawmnak ca i rian ah an buai bik, midang bantukin. Asinain Bu nih zaanghleicawi dingin fial an si caah midang nakin zaanghlei an cawi deuhnak cu a si. Pathian min in Fialmi an si. Zumtu tuanbia ah zaanghlei a cawimi hna hi mi zaangzel, rian ngeilo an si bal lo. Anmah le an rianṭuannak cio a “busy” ngaingaimi an si cio. Asinain Pathian nih a fial hna tikah ṭuan loin an um kho lo; an ṭuan i Pathian minung zumtu hna tuanbia ah thil aa dang zungzal:  Abraham le David zong an tuu khalh ah an buai ngai;
Andru le Piter zong an sur tholh le nga vorh ah an buai zungzal;
Matthai zong ngunkhuai kholh le cazin tuat ah a busy zungzal;
William Carey zong kedan chia remh ah aa manh bal lo;
Bill Wallace zong sibawi rian ah chunzan in a buai peng;

Jesuh kong ṭialtu Luka zong sibawi rian in a luat bal lo.A buai zungzal minung hna hi Bawipa nih rian a fial hna tikah cun an rian he an kemh chih lawng a si lo; Pathian rian caah caan a pek; zaanghlei an cawi, an pum an pek i, Pathian minung zumtu hna tuanbia ah a muithlam aa dantertu minung ah an cang. Pastor le Khrihfa Upa rianṭuannak ah aa khatmi a um bantuk in aa dan deuhnak zong a um. Cucu Baptist Bu nih hitiin an ṭialmi a um. (Now that You’re a DEACON by Howard B. Foshee, p 27): Mirang holh in ka ṭial.
There is a difference in pastor and deacon leadership roles. A church calls a pastor to
be a generalist leader. In his leadership role, the pastor serves somewhat as a player-
coach – an enabler. He is a grower of people. As a generalist leader the pastor leads
the church to determine its spiritual mission. A pastor succeeds as a leader when he
guides the church toward the attainment of its priority goals. The pastor, as a
generalist leader, serves as chairman of the church council – the planning team that
usually plans the total church program for church approval.Deacons, on the other hand, are exampler leaders. They serve as examples or models  for fellow Christians to follow. Rather than providing general directional leadership as
does the pastor, they serve as personal Christian examples to others. As examplar
leaders, deacons often serve behind the scene, out of the spotlight or central focus of
activities. Deacon leadership is in harmony with the idea stated by an ancient Chinese
philosopher: “A leader is best when people barely know that he exists; not so good
when people obey and acclaim him; worse when they despise him. Fail to honor
peole, they fail to honor you; but a good leader, who talks little, when his work is
finished they will say, we did this ourselves.”

 

Pastor le Khrihfa Upa Team KhatZeitindah Pastor le Khrihfa Upa hna “team khat” ah an ṭuanṭi lai?

Ruahnak pahnih thum hna cu: Nan Pastor a sining kha theih i zuam law, a rian zong tlingin theih i zuam. Mah Pastor theih khawh lo nih hin thilsual tampi a chuahpi.Nan Pastor he hmunkhat ah thlacam ṭi u. Phungthlukbia pakhat ah: “Pastor le Khrihfa upa thla a cam ṭimi cu an ṭuanṭi kho zungzal,” tiah a um.Nan Pastor a ṭhatnak kha hmuh i zuam. “Kan Pastor ṭhatnak bia pakhat tal chim kaa zuam lai” ti lungput ngeih awk a si. Thil dang chim awk na hngalh lo hmanh ah, “Kan Pastor cu aa biatak!” ti tal hi chim khawh awk a si.Pastor hi thapek an hau zungzal ve. “Na caah ni fate thla ka cam” ti kho hi a biapi.
Kum 81 a si cangmi deacon pakhat nih a Pastor kongah a chimmi bia cu: Mino ka si lio ka Pastor siseh, ka Khrihfabu siseh, ka thangchiat lai lo, tiah bia ka khiah cangmi a um. Kum hizat chungah Pastor hleinga he rian kan ṭuanṭi cang i an dihlak tein ka hawikom ṭha an si dih. Hi bantuk lungput hi kan Khrihfabu chungtel no hna sinah ngeih ve cio dingin ka forh duh hna. Hi bantuk lungput nih ka nunnak chungah lawmhnak tampi a chuahter zungzal,” a ti.Pastor le Khrihfa Upa hawikomhnak (fellowship) tuahṭi hi a ṭha. I chuahsual caan zongah hawikomhnak ngeihmi nih mi thinlung a tlunter i hna a ngamter. Khrihfabu nunnak ahhin ‘hawikomhnak’ nak i biapi deuhmi thil hi an tam lo. Derdai tik caan zongah thumthlak hrihrual bantuk in a cat kho lomi hawikomhnak cu a si tawn.