Lungthlennak

LUNGTHLENNAK

(Ezekiel 36 :26; Lam. 9 :1ff; IKor. 15 :2)

 

Kan tlangtaar Lungthlennak kong i kan kal hlanah “Laiphung in Pathian phung” i kan i thlennak kong tawite in chim hmasa ka duh. Thawngthabia chim timi hi Phungchim ti a rak si hmasa. Phungchim ti hmanh ah cun “Pathian Phung” ti deuh khi a rak si. Khrihfa ah a lutmi hna cu Pathian phung chungah a lut an rak ti i a lut lomi hna cu “Lai phung um” ti a rak si. Khrihfa a cangmi nih cun Laiphung um an rak si lio i an phunglam le an ziaza hna kha an hlawt i khrihfa/ Pathian phung ah an rak i thleng.

A ngaingai ti ah cun Khrihfa/Pathian phung nih hin kan Lai Nunphung hi a do lo. Hlanlio kan pipu hna nih “Hi hi cu a phung a si, hi hi cu a phung a si lo,” ti in an rak chimmi le an rak ulhmi kan phunglam kan nunphung hna hi Pathian Thawngthabia nih a do lo. A dohmi le a thlen mi cu kan Lai nunphung he aa cawhmi, aa tenhmi Lawkih phung tu a rak si. Kan lai nun ziadawh hna le kan nunphung hna hi Pathian nih thlua a kan chuahmi an si. Tahchunhnak ah kan thuam, kan lam hna le kan puai hna khi kan lai nunphung an si. A sinain khi kan puaile kan lam chung i an hman chihmi Zu khi kan lainunphung a si lo. Zu cu kan lai mi kan thawhkeh hlan pi in vawlei cung miphun kip nih an i ngeihmi a si. Zudin hoihna hi cu khuavang phung hmanh a rak si deuh. Khuavang cu zu dinh hmasa lawngah an chuak ti a si.

Hlan chan ah “Kawl ah ram an hrang” an rak ti i mi lu he an rak tlun hoi hna ahcun puai sangbik an rak tuah. Phuhlam, teirulcham, khuakhat le khuakhat rak i ral, rak i thah hna khi kan lai phung a rak si lo. A thangcho lomi/ a fim rihlo mi miphun kip i an rak hman cio mi a si. “Nupi cumh tha, Darkhuang cumh tha” ti phungthuk zong khi Lai phung a si hlei lo. A thangcho lomi vawlei cung kip ah an hman ciomi lungput a rak si ko. Cu caah Siangbawi te nih Thawngthabia an kan phorh i khrihfa i kan can tikah hin a kan thlen taktakmi cu vawlei nunphung, taksa duhnak lawkih phung tu kha a si. Pathian nih siter a kan duhmi nunning le ziaza kan i lak/ kan cawn a rak si.

Cu Laiphung tiah kan rak ruahmi lawkih phung in Pathian phung ah kan hun i thlen tikah a kan thlengtu cu Pathian thawngtha a si. Cu kan nunzia kan i thlen hlan ah a herh hmasa mi cu kan lungthlen hi a rak si. Lenglei i thlen hlan ah chunglei thlennak a um hmasa. Zumtu kan sinak ah pumpak cio nih kan ton hrimhrim a herhmi cu lungthlennak a si. Lungthlennak kong hi Baibal ah tampi kan hmuh. Cu hna lakah Paul lungthlennak hi vun i ruahti ka duh ko.

Paul i a muisam kong an chim tik poah ah kaa phuhrung ngai (Keimah kong an chim rua tiah). Mi niamte, calngau, hnarsau, mitkuak, samkernawn, ngal kawi a si an ti. Hi lio caan ah hin pa taw taktak a rak si. Chuahkehnak leiin Benjamin phun (Judah sangte chung kan ti lai cu), Judah phung a ttanh taktakmi le Farasi a si. Uknak lei in Rome citizen a ngeimi a si (Ramdangmi caah cun Rome ralkap kum 24 an tuan hnu lawngah citizen hmuhkhawh a rak si). Fimnak leiah Greek mifim an tamnak le Greek sianghleiruun a umnak Tarsus khua ah a chuak i a thangmi a si fawn. Khrihfami hna nih kan Judah phung an hrawh dih lai ti a phan leeng ah a fuat tuk hna caah hloh dih a timh hna. Nikhat cu theihhngalhnak ca (thohkhansa) aa lak i khrihfa pawl tlaih dingah aa thawh. Damascus khua a hei phanh lai ah ruahlopi in van in ceunak nih a kah i a tlu. Rang aa cit ah cun rangcung in a tla theu lai. “Saul, Saul, zeicahdah na ka hrem?,” ti aw pakhat a theih. “A hodah na si, Bawipa?,” tiah Paul nih cun a hal. “Keimah cu na hremmi Jesuh ka si. Tho law khua chungah va lut tuah, khika ah na tuah awk hnga kha an rak in chimh lai,” tiah aw nih cun a leh. Paul cu vawlei in a hung tho i a mit a hun au, sihmanhsehlaw zehmanh a hmu kho lo. Cucaah a kut in an hruai i Damaskas khua chungah cun an luhpi. Nithum chung khua hmu kholo in a um, cu chung vialte cu rawl zong a ei lo, ti zong a ding lo. Cu hnu cun, Ananias nih thla a cam piak i Paul mit cu nga phokphawher bantuk khi a tla i khua a hmu kho than. A dir i tipilnak kha a in. cun rawl a ei dih hnuah a thazaang kha a tlung than.

Paul lungthennak kong ruahtik ah mitampi nih cun Ceunak nih a kahnak hi biapibik ah kan ruah tawn. Pakhat pa cu Paul bantuk in ceunak nih ka kap ve selaw ti ruat pah in lam a kal lio ah ruahlopi in a cung i lam mei a hung i vaang ciamman i cu pa cu a khuk a vun i bil colh i “Hi ka ah hin ka um Bawipa” ati ti si. A ngaingai ah cun Paul nih ceu nak a hmuh le a tluk hi a biapi bik lo. Rang cung i a tlak zong a biapi bik a si lo. A biapi bik cu: cu lio caan i Bawipa aw a theihmi tu kha a si. Kan nih cio zong nih ceunak nih a kan kah ve ding hi a biapi bik lo. Tek a tlak zong ah, khua a rit zong ah ruah a sur zongah, rang cung i kan tlak zong ah, Motor cung i kan tlak zong ah, thing kung cung i kan tlak zong ah, zawtfahnak nih a kan tlak zongah Bawipa aw kan theih ding tu hi a biapi deuh mi a si. “Lal Cung Awi zeicahdah na ka hrem? Zeicah dah na ka serhsah? Zeicahdah na ka hlawt?,” ti aw theih hi a herh ko.

Paul nih hi bia a theih le cang ka in “Bawipa, a hodah na si?,” ti i a biahal hi duh a nung hringhran. Zeicahdah Bawipa tiah a ti hnga? A thinlung dihlak/ thilung kekkuai in a si hnga lo maw? Biachia zong a chimlo, lungtlin lonak zong a chimlo. Thinlung kekkuai in Bawipa a hodah na si a ti. “Na hremmi Jesuh ka si” tiah a leh than. An biaruah hi a tluangtuk, a nemtuk hringhran. A hlan i aa rak i dawtuk ciami an lo. Paul nih Jesuh ngaingai cu a rak hrem ballo. Pathian ca le Judah phung caah tiin khrihfami a rak hremmi kha Jesuh ka rak hrem le ka rak serhsat a si ti kha fiang tuk in aa thei. A cohlan. Midang cung i thatlonak le chiatnak kan tuahmi vialte zong hi Jesuh cung i kan tuah a rak si. Nu le pa mitthli kan tlak termi zong hi Jesuh mitthli kan tlakter a rak si. Pathian duhlomi kan tuahmi vialte zong hi Jesuh kan leirawi le kan hrem a rak si ko.

Lungthlen ti hi Conversion ti a si i sullam cu turning (i mer) ti a si. Na rak hoih tawnmi kha mertaak i hmundang panh kha a si. Paul cu a hlanah khrhfami hna hremtu/ral asi. A lung a thlen tikah khrihfami hna hawithabik le bochanbik ah a cang. A hlan ah cun Judah phung aa tlaih i mi tlaih le mithah dingah a kal. A hnu ah cun Jesuh dawtnak aa tlaih i mi thlarau tlai tu ah a cang. Cu caah Jesuh hremtu, Jesuh nehsawhtu, Jesuh ral kan si ti kan theih taktak ah cun kan theih bak in kan i mer hrimhrim a hau. Bawipa lamhruainak ah kan nun kan pek a hau.

Lungthlen timi bia lai holh in kan ngeih hi a rak tha tuk. Kan lung cu kan mah te nih kan i ser khawhmi a si lo. Thlen a herh tik zongah kanmah te in kan i thlen khawhmi a si lo. Kan thinlung surgery a kan tuahtu sibawi sin ah kan lung kan i ap ding tu kha kan nih kan rian cu a si. A kan thlengtu taktak cu Bawipa a si lai. Ezekiel 36 :26 chungah “Lungthin thar kan pek hna lai i thlarau thar nan chungah ka khumh lai. Nan pum chungin lung bantukin a hakmi nan lung kha ka lak lai i titsa bantukin a nemmi lung kha kan pek hna lai. Ka thlarau cu nan chungah ka khumh lai i ka nawlbia he aa tlak in kan um ter hna lai i ka phung zulh in nan nung lai” tiah kan hmuh.

A sinain voikhat lungthlennak hi khrihfa kan nunnak ah a tling tinak a si hrimhrim lo. I Peter 2 :25 ah “Tuu a tlaumi bantukin nan tlau cang, sihmanhsehlaw a tu cu nan nunnak Khaltu a simi le nan nunnak Cawngtu a simi leiah khan nan kir cang” a ti. Cu a kan Khaltu hnu kha zulh peng ding kan si. I Korin 15 :2 ah “Thawngtha cu kan chimh hna ning khan fek tein nan i tlaih ko lo maw? Nan i tlaih lo ahcun nan lungthlennak cu pakpalawng a si ko hnga” ti kan hmuh fawn. A..kan thlengtu thawngtha kha fek tein i tlaih peng kan herh. Pa Hlun nih “Vancung cu nunchung lam kal a si” a rak ti bal. a hmantuk. Lungthlennak kan timi zonghi voikhat i kan rak i thlennak kha a za lo. Kan nunchung vancung kan phanh hlan tiang i sersiam i thlen awk kan ngei zungzal lai. Tipil kan in laiah pastor nih “Jesuh cu ka Khamhtu le ka Bawi a si tiah na zum maw?,” tiah a kan halmi khi sullam a ngei. Jesuh nih a kan khamhnak cu voikhat ah zalakin a si. Asinain Jesuh cu ka Bawi a si kan ti tikah voikhat ca lawng a si lo. Kan nunchung kan thih hnu ca tiang in kan Bawi si ding kha a si.

Ka pa (Rev. Robert Vai Al) hi laiphung chungkhar, khuavaang ngei chungin a chuakmi a si. Mi he aa sii vel zungzalmi, mi nih a celh an rak celhlomi a rak si. A sinain a lung aa thleng i khrihfa phung i a hung luh tikah cun a hlan i a zia vialte kha a kal taak. Baibal sianginn kai an rak fial. A rak kal lai teah khrihfa upa nih an rak len i bia pakhat an rak cah. “A tu cu Baibal sianginn zong na kai cang lai caah bia pakhat te kan in cah duhmi cu na lam kal dan naa thinh hrimhrim lai,” tiah an rak ti an ti. Ka pa cu a kut tumbu in le a ttang ar bu in a sir lei a zoh pah i a kal tawn ti a si. Bawipa lei ah kan lung aa thlengmi kan si tik ah cun kan kal dan hmanh hi i thinh kan hauh caan a rak um ko. Ka pa cu kum 60 a tlin hnu le Pathian rian kum 35 a tuan hnu zongah a nunnak ah hin a tling hlei lo. I thinh, i thlen a huahmi tampi a um. A nunchung thawngtha kha fek te in aa tleih peng i Bawipa duhnak kha a zulh peng a hau. Cu loah cun a lungthlennak kha pakpalawng ah a cang ko hnga.

Cucaah dawtmi u le nau hna, lungthlen haumi kan si ah cun Sibawi thiamsangbik Dr. Jesuh sinah i ap usi law amah nih a duh ning tein a kan thlen piak ko lai. Cun, lungthleng ciami kan si ah cun kan lungthennak pakpalawng i a can lo nak hnga, Thawngtha kan rak theihmi kha fek tein i tlaih buin Bawi Khrih hnu zul hna usih.

 

A Rian Thiang ah,

Lal Cung Awi

Indianapolis