Mupi Bang In

“Mupi Bang In”

Baibal caang thim:  “Sihmanhsehlaw Bawipa aa bochanmi cu thazang thar an la. Mupi bang in an zuang lai; an tlik tikah an baa lai lo, an kal tik zongah an tha a di lai lo” (Isa. 40:31).

Biahmaithi: Laimi sinah Khrih thawngtha a phanhnak kum 100 a tling. Lairam cu Khrihfa ram kan si taktak nak cu kum 50 hrawng lawng a si rih. Cu tluk in kum a nomi kan si ko nain, camping/crusade kan tuah ning, kan thlacam ning, le tehte kan khan ning cu midang nak in kan cawlcang. Asinain, Khrihfa kan sinak nih hin kan nun a kan thleng taktak maw… ti hi ka ruat tawn. Laimi Khrihfa kan si hlan ah inn tawh hrenh a um ballo. Kuang le Bukbau zong tawh hrenh a rak si ballo. Asinain, a tu chan tu ah cun tawh hrenh lo in inn kan tthinh taak ngam ti lo. Zeicaah tiah mifir kan tih cang. Cun, chimkeem kan ngeihmi pakhat cu “Lihchim le Fir” ti a si. A sullam cu Lihbia chim hmanh hi kan pupa nih Fir tluk in an rak huat. Asinain, a tu chan ahcun Lihchim zong zei poi ah kan rel ti lo. Ahlan nak in dawtnak a karh deuh taktak maw ti zongah Baibal nih a kan cawnpiakmi dawtnak taktak kan nun ah a lang loCucaah, Isaiah nih “Bawipa aa bochanmi cu…Mupi bangin an thawng lai a timi hi kan si taktak maw?

Mupi bantuk Khrihfa cu a tanglei bantuk hi an si:

  1. Mupi cu mirang nih “King of the Sky” (Van cung pentu) an ti. Van Pe thong hnih thong thum a sannak ah aa hlerh i saram a hohmanh nih an tluk lo. A taksa aa hrual ning le a muscle a that ning cu chiandeih bantuk a si. Suimilam 1 ah meng 150 tluk rang in a zuang kho. Van in vawlei ah sa a cawi lai  ahcun suimilam 1 ah meng 200 rang in a zuanhnawh khawh. A chan zong a sau. Cutluk in a thawn nak a ruang bik cu “Sa thianghlim lawng lawng a ei caah a si.” Sa thu hnawm zeitik hmanh ah a ei lo. Anih cu langta bantuk, langaak bantuk in sathurhmawn, sathu hnawm a ei lo. Protein a tammi vitamin a tammi, sa tha, sa thianghlim lawnglawng a ei. Cucaah, mupi cu thlarau rawl lawng a ei mi a si kan ti khawh. Vawlei taksa a thurhnawmmi rawl ttukttak a ei lo. Cucaah, Mupi bantuk Khrihfami cu thlarau rawl thianghlim lawng lawng nifa kan nunnak ah a ei ding kan si. Rawl chia-hru, rawl thurhnawm, vawleicung taksa sinak rawl ei ding kan si lo.
  2. Mupi cu a mit a fim, a hla pi in thil fiang tein a hmu khomi a si. Minung kan mit nih khua a hmuhnak hi a kaubik 180 degree lawng a si. Asinain, Mupi cu a mit nih 270 degree tiang kau a hmuh khawh. A mit nih cunglei nika khi dengteu te in a zoh khawh. Cu bantuk in, Khrihfami zong mit fim te in khua a zoh ding, thil hlatpi tiang a hmu kho ding kan si. Pathian lei a zoh zungzal ding kan si.
  3. Mupi cu thlichia a hran tik ah a zaamtaak lo. Va dang le saram dang cu thlichia ruahpi a hran tikah an zaam. Mupi cu thlichia a hran tik ah thlichia tu kha a thazaang ah aa lak. Thlichia cung in a zuang i Nika a chuah lai a cuan zungzal. Hi nih hin, Khrihfami cu tukforhnak lawng zoh i zaamtaak tu si lo in, tukforhnak cungah zuan i Pathian tu kha ding te in zoh ding le tukforhnak tei tu ding kan si. Mupi nih ni a chuah lai a ngan peng bang in tukforh lak zongah Pathian zoh peng ding kan si.
  4. Mupi nun cu “One mate one life” an ti. A pa (a hli) pakhat nih a nun chungah a nu pakhat lawng lawng he an i kawp. Ar bantuk in a nu kip le a pa kip he an i vei lo . An i man tik zongah an nupa in vaan sang pi khin, hmaitonh in an ke tin veve an i tlai, a pa nih a thla in a kuh, a nu nih a pa ttang ah aa beek, i van in vawlei ah diving an thu. Cun, van ah an zuang than. An ke an i sih than. Nu nih a thla in a kuh ve i pa nih an nu ttaang ah aa dup than. Cu ti cun vawlei lei ah diving an run thut tthan. Cun, Mupi cu bu a ser tik ah a nu nih a ti a tlumh chungah a bu a kaltaak lo, a pa nih a leeng in a kil ven. An nu a kaltaak bal lo. Hi nih hin thil tampi a kan cawnpiak. Chan khat chuah ah kan nupi le kan va cungah zumhtlak te in nung ding kan si. Kan nupi le kan va le kan dawt cikcek hna ding a si. A cheu nih, “Darkhuang cumh ttha, Nu cumh ttha” tiah phungthluk bang in an chim tawn. Mah hi hi a hman lomi, mi zuri pawl i an chim sawhsawh mi a rak si lai. Kan laiphung taktak ahcun, pa nih kan nupi le hi kan kut par hmanh in tongh phung a si lo. Pa nih mi fanu kan tthit i kut kan zauh sual hna ahcun a tta le a pa sinah sahring thi tiang luanter phung a si.
  5. Mupi cu thinlung dai tein a um i a pawngkam va fa tete nih an cuk tawn zongah a let hna lo. A zuan taak men ko hna. Cuk in an dawi zongah van saangpi tu ah a hung zuang chin. Va fa tete nih a sannak ah an dawi kho ti lo, thaw chuah awk an ngei ti lo. Mupi bang in Pathian aa bochanmi Khrihfami hna cu a leeng lei, pawngkam nih soisel, thangchiat, le cuk caan a um tawn. Asinain, anmah bang in a let hna lo. Van lei (Pathian lei) tu ah a zuang i tha zaang a la. A sannak a phanh tikah a soisel tu le a do tu pawl nih an dawi kho ti lo.

Pu Lian Cin

March 01, 2014; ICBC Zanpumh