Thlarau Nih A Chuahpimi Nun

(Bawipa cu a ka khamhtu a si ti cohlan hnu ah zeitindah kan nunning a si?)
Baibal cherhchan:  Galati 5:22-23

By Pi Par Hniang Lian

Biahram domh:

“Bawipa cu ka khamhtu a si ti cohlan hi a hmasabik ah a biapi tuk i cuti kan cohlan hnu ah zeitindah kan i nun pi lai timi hi a biapi tuk ṭhiam ṭhiam,” tiah Rev. Hoi Cung Tum cawnpiaknak youtube i an thlahmi ah ka ngaih i ka lung a tling ngai. Minung le minung kan i dawtnak hmanh ah kan dawtmi hna nih kan lomhter hna sehlaw kan lung kan tong hna seh ti kan duh. Fapa ngeihchun pek tiang in a kan daw tu chin chin nihcun a dawtmi hna sin hin zei khi dah aa ruahchan mi a si hnga? Isaiah 66 chung ah   van le vawlei hi keimah nih  ka ser ee a ti. Mah caah cun a dawtmi hna sin hin a herh mi hi a Mah dawt ve le a duhning i  nun hi a kan duh piak mi si ko. A si kun ahcun a Mah a duh ning i nun cu zeikhidah a si timi kha keimah ka zumhnak in ṭhen (7) ah ka rak ṭhen ve. Keimah nih ka zulh khawh dih caah silo in zulh I zuam ding in kan sawm mi hna tu asi deuh.

(1)    Pa khat le khat kan ni dawt ninghi zeibantuk dawtnak dah asi?

Ṭhatnak i tuah piak khawh, i zohkhenh khawh, le i pehtlaih khawh lawngah maw kan ni daw kan ti hnga? A silo ah na u nau kha san an tlai lo i na theihthiam piak hna i na dawt khawh mi hna tiang lawng dah a si? Mah tiang lawng a si ahcun zumlotu nakin zeihmanh a hlei in na tuah mi a um hnga lo. Bawipa nih a kan duh piakmi dawtnak cu na u na nau, na hawikom, an zoh kho ko nain a zoh awk i an in theih lo zei rel awk i an in ruah lo lio zong ah, an theih lehlo cuta tiin na ngaihthiam i na dawt khawh hna lawngah na chung ah Jesuh a um naa ti ngam ding si lai. Na u na nau, na hawikom cung i  na lungfahnak kha naa uam peng i na thin a dam khawh lo ahcun Bawipa na cohlan mi kha na ka lawng in a si ti nak si hnga. Minung sining in chikkhat thinhun cu hrial a har ngai nain, Cathiang nih na thinhunnak kha nitlak liam ter hlah law a ti kha kan hmuh. Kan Senior Pastor nih a rak kan cawnpiak mi ah, huatmi le remlomi ngeih cu i hrial a hau i kan vawlei, kan hmunhma kan bitter chin lengmang a ti (I Korin 13: 6-17 relchih ding).

(2) In khawhnak taktak kan ngei maw?

Kan ruah kan ruah i rethei ngai in kan khaan kan tuahmi khi mi nih zei rello le soisel kan ton tikah, a si loah zumhnak lei zong in soisel le neeknak kan ton tikah zeitin dah kan um? Ciap cikcek in leh riangmang i ka ṭhuat, ka cheih bak tiah kan di hoi a riam tuk sual maw? A si lo ah, “Ziah! mah ti cun thil a si hnga? Zeidah ka tuahmi an hnatlak lo mi si hnga?” tiah i chek nak tu ah dah kan hman i lung thiang ten kan phisin (kawl holh kaa hlan ta) maw? Si inn lei holh-le- nak ah nan fale an ṭah tuk tik ah thin tawi in nan thin nan vo sual nak hnga lo na fa kha chia ta law inleeng ah i hrim ta law tiah cawnpiak si tawn. Khrihfa cu kan van a ṭhatuk i kan ngaih chiat tik ah i hnemhnak ah Pathian bia le hla kan ngai i Pathian sinah  kan ngaihchiatnak chim khawh a si. A si nain cu kan hriamnam cu hman kan theih lo ahcun mualphonak le ningzahnak ton a fawituk. Bawipa kan chung i a nun tak ahcun hi hriamnam hmang in kan doh awk a si.

(3) A ṭha lei in khua kan ruat kho maw?
Bawi Jesuh nih uico a thu cang mi kha  aa thawh i “Cu tluk ha tian rem dah!” a ti. A biana ah kan hawidawt he kan i tong hnga i chonh lo le zoh lo in kan lonhtaak sehlaw,  “Zeidah ka sual hnga? Zei ko dah ka cung ah a lung tlin hngalo,” ti lei in na ruah ahcun na lungre a thei lai i nan karlak ah hnakruh dohnak  um kho men. A si nain “Zei khua ko dah a ruah hnga keimah hmu lo tiang in!”  ti lei i na ruah khawh ahcun na thin a dam lai i nan ni dawt nak zong hma a um lai lo. Mah bantuk cu kan Bawipa nih a duh lawng si loin kan thinlung damnak zong a si hrim hrim ko. Bawipa he cun kan ti khawh ding si ko hnga lo maw?

(4)Pakhat le pakhat kan i hmaizah in kan i upat maw?
Bia kan chim tikah midang nih zeitindah an i ruah (feel) ti mi hi a biapi tuk. A hmaan mi ka ṭanh, ka lung a thiang ti phun i mi si ning tuk i ti tehna khi i hmaizah lo a si. “Bawi Jesuh zong nih pei Farasi pawl kha dengteo in a ti ko hna cu…” tiah biahal nak um kho men. Bawi Zisuh cu kan Bawi a si kha philh hlah u sih. Cun a nawl kan i cawn ahcun a zultu ke a ṭawl hna kha kan cawn chih a hau ti philh hlah u sih. Pathian hmai ah cun a sual, suallo, a fim, fimlo, a rum, le sifaak ti um lo in aa tluk tein a kan dawt dih. Rev. Lal Cung Awi nih a rak kan cawnpiak mi ah “Mei le Cite cu thleidannak an ngei lo, an al nak le an ceu nak mi sinah aa ruang te in an kan pek,” a ti. Kanmah nih pakhat  khat kan i phenh ter lo ahcun a kan ceuh dih ko ati. Cu bantuk cun kan Bawipa dawtnak cu a si i kan sining tein pakhat le khat i cohlan kha a kan duhpiak mi si. I thleidan a kan duh piakmi si lo (Rom 15:7 relchih ding). Bawipa ka sual thil a rit ko nangmah bomh ka herh ko ti in thla a cam mi pa kha, Bawipa nangmah thawngin sualnak ka tuah lo ti thla cam mi pa nakin a cohlan deuh ko lai. Zeicahtiah Mathai 5:3; Marka 2: 17 ah fiang tein kan hmuh.

(5)Khrih cu nge tampi a ngeimi pum bantuk a si ti hi kan cohlang maw? (1korin 12:12, 1 korin 12:18-20)
Khrihfabu pakhat chung ah hin Pathian nih kanmah le kan i tlak nak hmun cio ah a kan chiah cio. Mi pakhat nih a rak ṭuanmi kha a dang pakhat nih a ṭuan khawh lomi a si men ko lai nain, ka ṭuanmi an ṭuan ve lo tiah mi kha uh ṭanh phun le teinak phun in ti ding si lo. Zeicahtiah cun Pathian nih zei zawn i a hman le zei a tuah khawh kha na hngalh khawh ṭung  lo. Mi tuah mi kha a hme te si zongah kan upat piak ding tu kha a si. Pathian nih kan tuah mi a hmet ngan nak in zei lungthin he dah an ṭuan ti tu kha a zoh mi a si. Thilṭha na tuah pah in midang na hnor pah, na ceen pah hna ahcun na retheihnak kha pokpalawng  si ko lai. Sual phawt ṭhiam ṭhian huah a si ko lai caah tuah lo hmanh ṭha deuh. Pakhat le khat i hmuhthiam hi Khrihfabu ahcun a biapi tuk. Meeting kan tuah te hna zong ah kan duh ning a si khawh lo tik ah hawi duhning kan i hrawm kho maw? Rom 12:18-19  zong ah kan hmuh. A si lo ah kan i hrawm ko ti riangmang i caanṭha um tik ah chuah ṭhan i kha ca, khi ca hmanh ah  cu ti cun nan ti ko i mah hi cu tuah ding si ko hei ti bantuk i kan chuah ṭhan ahcun, zapi duhnak naa hrawm mi kha na lih a si. Chiatni ṭhatni ah tah kan ni zuan hnawh maw? Kan palhnak kha i maimilh piak loin sualnak lawng hoi kan ni bawh sual maw? (Phungthlukbia 17:9 relchih ding).

(6)Kan lung a nem maw?
Toidor nun cu chim hau lo ah chia ko u si law lungnem ti mi hi zoh usih ti ka duh. Mathai 11:28 zong ah “Kei cu nunnem mi ka si i ka nawl i cawn u,” a ti. Phungthlukbia 15:4 zong ah “Bia nem cu nunnak thing kung a si,” a ti. Mi nung cu kan i lo cio lo i a hrang aa ziak mi le a nem aa ziak mi tiah kan um ko lai nain a bia abo mi pa zong khi a mah theih ding ah cun bianem a duh ve ko cuh. Ka bia hram ah ka chim cang bang in,  Bawipa kan dawt tak tak ahcun kan cawn awk a si ko. Kan chung i Jesuh a um cun a ho poh nih bia an kan ruah ngam le an kan komh ngam ding si. Sual a ka kawl sual hnga maw ti i  an nin zeuh ahcun na chung ah Jesuh an hmu lo i a si ko lai. Best Buy rian kan ṭuan nak ah Khrifabu pakhat i pastor pa kha ka hawi nu miring nu nih “a chung ah Jesuh ka hmuh ,” a ka ti. Kaa khat hmanh Pastor pa nih  a cawnpiak bal lo nain a nun can in a rak cawn piak ko.

(7)Kan lung kan uk kho maw? (Self Control kan ngei maw?)
Joyce Meyer nih, “Born again kan si bak khin mah le mah i uk khawh nak nih a zulh colh,” a ti. Kan lung kan uk kho kan ti tik ah a ṭha lomi tuah i sum lawng ah ka rak ruah tawn. Mah lawng si lo in a ṭhami, tuah a hau ti theih in huam lo bu te zong in i hnek khi a rak si ve. Bianabia ah, vur a tlak i a kihtuk lio ah mi ṭhutpi ding maw, meeting maw, pumh maw kal a hau nain na huam lo. Inn te hin thla rak cam ko ning na ti i na tuah ding na tlolh ahcun, va kal riangmang in sual na tuah lo nan nang mah le nang mah naa uk khawh lo caah ka thar ee, Jesuh ka ngei ee na tin ngam hnga maw? Jeim 4:17ah fiang tein kan hmuh.

Rev. Lian Do Kham nih Thawngṭha a rak kan chimh mi ah, “Crossless Christ & Christless Cross,” ti mi a kan chimh. Vailam phorh huam lo in Jesuh min lawng i tlaih le Jesuh aa tel lo mi Vailam tung i put ti ko u si. Mi pakhat cu thlacam a ṭhawng ngai, Baibal zong  a rel zungzal, pumh zong huam ngai nain, midang ca i caan i peek sian lo, Khrihfa bu ca zong i retheih huam lo, rethei le ngaihchia mi hnemh zong huam lo i a um ahcun Jesuh min aa put ko nain a Vailam a phorh huam lo mi si ko hnga. Cun, midang caah a caan a hmang siang ngai, Khrihfa bu zong nih an bochan ngai, mi hramh zong ah pakhatnak , pekchanh lei zong ah a siang ngai ko nain Bawipa thangṭhat, Baibal rel, hlasak, le thlacam a huam bak lo mi le biapi ah a chia lo mi khi Jesuh aa tel lomi Vailam a lawngpi aa put mi an si ee a ti. Jeim 2:26 ah fiangten kan hmuh. Pum cu thlarau lo in a thih bantuk in thlarau zong tuahnak lo in a thi ve a ti.

A donghnak ah fun ka duh mi cu zulh awk tampi lak ah hi pa sarih te tal hi i chek pah in 2015 kum kar hlang ṭi ding in kan sawm hna.

Careltu dihlak Bawipa nih Thluachuahnak in pe ko hna seh!

Amen.