“Nan lakah nan unau pakhatkhat mipam a um ahcun, cu nan unau mipampa cungah cun nan kut nan hahter lai lo i nan kut zong nan humkanh lai lo, nan kut cu a samhtu nan samhpiak lai”

(Deuteronomi 15:7)

Larry Steward cu sifaak chungkhar in a rak ṭhangmi a si. Sianginn a kai hnu, a hawile inn a len hnu lawng in an inn ah bathroom, telephones, le tisa lum te hna a um lo a rak hngalh. A hung tlangvaal i mi innka kingh in thil a zuarmi company pakhat ah rian a ṭuan. A nihlawh a niam ngai caah zarh a tonh kho fang a si tawn. Vanchiat ah a rianṭuannak company cu a rawk i harsatnak nih a den chin. Hman awk tangka a ngeih ti lo ca ah rawl lo in zan a riah caan zong a um.

Zing khat cu rawl lo in ni hnih a um hnu ah Dixie Diner rawl dawr ah breakfast ei ding in a lut. Ka ei khawh in ka zaam te lai, asilo ah ka tangka bawm ka thlau ka ti te lai, tiah aa ruah. 1971 kum khuasik thla ah a si. Breakfast a cahmi cu a ei i lungrethei ngai in a um lio ah, a rak ngia ziar tu dawr ngeitu pa Ted Horn nih tangka $20 zelṭuang ah aa char ter i, “Ka fapa, mah hi nangmah nih na thlak sualmi a si bak lai,” tiah a pek. Larry cu lawmhnak in a khat i, “Bawipa, ni khatkhat ah midang bawm khotu dirhmun i na ka chiah ahcun ka bawmh hrimhrim hna lai,” tiah a lung chung in thla a cam.

Kum caan a hung liam i Larry cu a rian tlaihmi a ṭha deuh deuh a khuasak zong a hung ṭha deuh deuh ve. Khuasik thla zan khat cu lam kam i rawl dawr ah motor mongh bu in rawl a cah. Rawl a rak cha’ntu nute (waitress) cu angki leeng tlek aa hruk caah a zaang a faak i, “Keep the change,” tiah tangka hlei cu a ṭhenh. Nungak nute cu aa lawmtuk ah a aw zong a ther dih –  “Na ka ṭhenhmi hi ka ca ah zeitluk in dah man a ngeih ti na hngal lai lo!” tiah a ti. Cu nihcun Larry cu a lung suk ngaingai i mihar bawmh aa thawk. Ahlei in, Christmas thla chung ah mi sifaak a kawl hna i a hmuhmi poh $100, $200 ti in a ṭhenh hna. Cuticun kum 26 chung cu mi nih aho a si, ti hngalh lo in mi harsa a bawmh hna. “Secret Santa” ti lawng in an rak hngalh.

Asinain, 2006 kum Christmas lai te ah Larry Steward nih mi zapi theih in a ho a si aa phuan. Cu ahcun, a kum 58 a si cang. Missouri state, Lee’s Summit khua ah a ummi a si. Cu ti i aa phuannak a ruang cu, ruah lo tuk in cancer nih a tlak i dam kho ding a si ti lo ca ah, ka tuanbia nih  midang zong thazaang pe hna sehlaw mihar bawmtu tampi hung chuak hna seh, ti a duh ca ah a si. Newspaper pakhat nih zapi sin ah a kong ṭial an timh nain amah hmurka te tu in i phuan aa thim.  Cuticun, Larry cu 2007 kum ah a thi. A nun chung ah $100, $200 tete in mihar bawmhnak ca ah a hmanmi tangka dihlak hi $1.3 million a phan. A takpum cu thi hmanh sehlaw dawtnak a ngeihmi le mihar bawmhnak rian a ṭuanmi cu a ṭhang chin. Mi tampi nih nihin tiang an run peh rih ko.

A chimmi bia pakhat cu, “Ruahchannak a ngei lomi hna nih chikkhat te ah ruahchannak a ngeihmi ah an hun i thlen khi ka mithmuh bak a si. A ngaingai ti ahcun, hi vawlei i kan chuah hi pakhat le pakhat i bawmh ding ah dahkaw a si ko cu,” ti a si.

 Christmas Lawmhnak nan cungah Um ko seh!

Cherhchanmi cauk le  online articles:

1. Larson, Craig Grain & other, Eds. 1001 Illustrations That Connect: Compelling Stories, Stats, and New Items For Preaching, Teaching, and Writing. Zondervan: 2008

2. https://www.goodnewsnetwork.org/the-original-secret-santa-started-it-all-by-paying-back-kindness-shown-while-he-was-homeless/

3. https://www.nbcnews.com/id/wbna16607436