Aa thawknak:

Indiana Chin Baptist Church (ICBC) cu February 08, 2004 ni ah Burma ram in a rami Chin Ralzaam mi tlawmte nih rak thawkmi a si. ICBC rak thawk hlan ahhin Indianapolis khua ah Laimi khrihfabu pathum a rak um. Cu hna cu Chin Evangelical Baptist Church (CEBC), Chin Christian Community Church (CCCC), le Indiana Chin Christian Fellowship (ICCF) an rak si. Cu lio ahcun Indianapolis khua ah Laimi tlawmte lawng rak um lio a si caah khrihfabu ṭhenchaunak nih fahnak le harnak tampi a chuahpi. Cucaah, khrihfabu fonhṭhan a duhmi hna nih February 08, 2004, Sunday 2:00 PM ah Woodland Baptist Church, Indianapolis ah fonhnak pumhnak cu rak tuah a si i khrihfabu min zong Indiana Chin Baptist Church tiah hun bunh a si. Cucaah, ICBC khrihfabu aa thawknak chan cu, Laimi khrihfa pakhat le pakhat kar ah i khahlonak um hmanh sehlaw, Jesuh Khrih thawng in i rem ṭhan le hmun khat tein Pathian thangṭhat ṭi hi a si. Khrihfabu tlangtaar cu Bawi Jesuh Khrih nih bia a kan cahtaakmi, “Pakhat le Pakhat i Daw U” (Johan 15:12) a si.  

Bawipa Ni Pumhnak:

Pathian velngeihnak thawng in ICBC Khrihfabu cu nikhat hnu nikhat in a ṭhangcho. Malaysia, India, le hmun dangdang in Laimi Ralzaam kan unau hna US an phanh tikah mah le naihniam le siaremnak cio ah i fuhphanh cio a si. Burma i a ummi nupi/va le fale zong (family petition in) kawhauh cio a si. Cuticun, ICBC khrihfabu cu chungtel thong thum leeng hmunkhat te ah Pathian thangṭhat ṭinak le khuasak ṭinak hmun ah a hung cang. Zarh fatein Bawipa Ni ah biakinn i aa pummi hi upa 800 – 1000 kar le Sunday School ngakchia 500 – 600 kar lengmang kan si. Zinglei 11:00 AM lengmang ah Sunday Worship Service thawk a si. Pumhnak chung ah Lai holh (Halkha holh) in caan hman a si. Lai holh a thei lomi hna ca ah English le Burmese in holh lehpiak an a si i mahle ṭhutnak hmun cio in headphones in an ngeih. Zarh fatein mino 50 – 60 kar nih Church Choir an remh. Pumh hramthawk ah Praise & Worship Team nih thangṭhatnak hla saknak in an hruai. Sunday Program cu Media Ministry nih ICBC Website, Facebook page, le YouTube in live a thlah.

Biakinn Saknak:

Khrihfabu a dirnak kum 12 a rauh hnu ah Pathian nih a biakin thiang sak khawhnak caan ṭha a kan pek. Tlakrawh le Steel in T-shaped in sak a si. 45,827 square feet a kau. Sanctuary (118’ X 130’), Gym Hall (120’ X 98’), le Sunday School Class Rooms & Offices ti in ṭhen a si. Biakinn hmai ah 65 feet a sangmi Vailamtung a dir. Nichuah lei innka tung ah “This Rock is From Chin State” tiah aa ṭialmi lungtlap zong hmuh khawh a si. Biakinn rak sak hlan ah ICBC Senior Pastor Rev. Dr. Stephen Hre Kio nih Laitlang in lung a rak phawrh i cu lung cu cheu hnih ah cheu a si. Cheukhat cu Biakinn innkil lung ah phum a si. Cheukhat cu nichuahlei biakinn innka ba ah benh a si. Cu leeng ah, 12’ X 8’ a saumi, Burma in rak phawrhmi tlor thing vailamtah zong taar a si. Cu vailamtah tang ah Lai Baibal Thiang lak ah a nganbik in print mi Pulpit Bible zong hun a si. Cu hna cu, ahlei in kan hmaichanmi hna (next generations) nih, Pathian an zumhnak lawng siloin, aho an si an i hngalhnak ca ah bawmchantu a si lai tiah kan ruah. Cuticun, November 26, 2016 ni ah biakinn thiang cu Pathian sin pekchanh thlacamnak ngeih a si. 

Pehtlaihnak:

ICBC cu US Cozah sin ah Non-Profit Organization pakhat sinak in register a tuahmi a si. 2007 kum thawk in American Baptist Churches of Greater Indianapolis ah chungtel sinak a la i pehtlaihnak ṭha tein a ngei. American Baptist Churches cu Burma le Lairam ah khamhnak thawngṭha a kan phawrh hmasatu an si i thlarau lei in kan nulepa an si ca ah anmah he pehtlaihnak ngeih hi a biapi mi ah kan chiah. Cun, kan Chin nunphung, ca, le holh kilven, ṭhanchoter cu khrihfabu i tinhmi pakhat a si ca ah 2006 kum thawk in Chin Association of Christian Community (CACC) chungtel sinak a laak. Nihin tiang khrihfabu budget dihlak i 3% (2006 – 2019 cu 4%) in CACC ah pehtlaihnak felfai tein a pek. CACC i a kengruh si ding cu khrihfabu i saduhthah a si. Cu lawng siloin, 2010 kum thawk in Laimi khrihfabu 127 i funnak Chin Baptist Churches USA (CBCUSA) ah chungtel sinak tlamtling tein a laak. CBCUSA nih aa hmaithlakmi mission le ministry ah zumhtlak te le lungtho ngai in rian kan ṭuanṭi hna.

Logos Center Saknak

Pathian zaangfahnak thawng in, Sunday School a kaimi kan fale tete an hun karh deuh tik ah classrooms kan ngeihmi nih a zaat ti hna lo i an saya/sayama te cu awlok chong in an um. Cu cu kan upa pakhat nih, “Good Problem a si,” tiah a rak ti. Kan fale an karh ruang i classrooms kong ah lungre thei in kan um cu Pathian thluachuah nganpi a si. Cucaah, February 27, 2022 ni ah Church Council upa hna nih biakinn thar a rannak in sak ding in biachahnak an tuah i Building Committee ser colh a si. Building Committee ah Pu Cungbik Zaathang (Convenor), Pu Sangbawi Lian, Pu Shwe Awe Lyan, Pu Siang Herh, Pu Than Hre, Pu Thlasui Tluangneh, Sayama Win Church, Pu Peng Uk (Treasurer), Pu Lal Ceu (Property Committee Chairman), Pu Joel Kingbawl (Engineer), le Remkung Tluangneh (Engineer), le pastor te dihlak cu thim an si.

Cuticun, Building Committee hruainak in biakinn sak ding cu timhlamh a hung si i, Pu Van Lian Kio hruaimi Noah Homes, LLC cu General Contractor ah thim a si. Biakinn cu a tung-vang 240’ X 54’ dot hnih, Tlakrawh le Steel in sing sawmnga (five million dollars) dih in sak ding ah July 10, 2023, ah kap hnih hnatlaknak min thut a si. General Contractor nih sak hram an hun thawk i kum khat le thla nga ah an lim. November 28, 2024 (Thursday), 11:00 AM ah khrihfabu nih Pathian sin ah pekchanh thlacamnak kan tuah. A chung ah classrooms 20, cafeteria room khat, le a cung dot ah minung 300 tlum Chapel a um. Classrooms kip ah cacawnnak ca ah 80’ SMART TV chiah a si. Chapel chung ah thingṭha in sermi ṭhutdan thluan (pews) chiah an si i 15’X13’ LED Screen le Sound system zong ṭha tein bumh an si. Biakinn saknak le a chung thilri vialte zalhnak ca ah a dihlak ah sing sawmruk (six million dollars) hrawng a dih.

Hi Sunday School Building cu kan fale nih Pathian bia an cawnnak le thlarau hnukthlum an dinnak hmun a si ca ah “Logos Center” tiah min sak a si. Zarhpi ni fate in Sunday School kainak ah siseh, ICBC Preschool nih Monday – Friday kar cawnnak ah siseh, High school ministry nih Wednesday zan fatin pumhnak le Baibal cawnnak ah siseh hman a si. Hmailei ahcun, Christian School tiang tuah kho te ding in saduhthahnak kan ngei. Hi Logos Center saknak ca ah thlacamnak, khuaruahnak le fimnak, ngeihchiah chawva, le tha le zaang in re a theimi vialte cung ah lawmhnak tampi kan ngei.