Khrihfa Innchungkhar caah Pathian Tinhmi

Sihmanhsehlaw keimah le ka innchungkhar nih cun Bawipa rian kan ṭuan lai,” tiah a ti.

Joshua 24:15

Biahmaiṭhi

Nihin ah Pathian nih khrihfa innchungkhar a tinhmi kong ka ţial duh. Zeicahdah Pathian nih chungkhar a ser? Pathian nih va, nupi le fale sinin zeidah aa ruahchan? Chungkhar a rawk cuahmahmi vawlei ah, Baibal ah kir ṭhan buin Pathian nih chungkhar caah a hramthawk tein a rak tinhmi kha hngalhthiam a biapi chin lengmang.

Khrihfa innchungkhar cu chungkhar sawhsawh ah a ummi lawng si loin, (small church) Biakinn hmete a si, “training” tuahnak hmun a si. Pathian dawtnak, zumhnak le Pathian nawlngaihnak hna hi nifatin tein tuah nak hmun a si, ti hi kan fian a herh tuk mi a si.

Pathian cu Chungkhar sertu A Si.

Genesis 2:24 chung ah Pathian nih chungkhar a sernak kong kan hmuh. “Cucaah pa nih a nu le a pa kha a kaltak hna i a nupi he an i komh i an pahnih in pum khat an si.” Pathian nih nuva sinak le innchungkhar hi minung nunnak caah a ṭhami khuakhannak ah a sermi a si. Adam le Evi kha pakhat le pakhat a pek hna. Cu nih a kan hmuhsakmi cu chungkhar cu minung ruahnak menmen a si lo, Pathian nih a suaimi le tuah mi a si. Khrihfa chungkhar cu Pathian a ṭihmi ṭhitumhnak in aa thawk. Wayne Grudem nih, “Ṭhitumhnak cu Pathian ruahnak a si, minung ruahnak a si lo, cun a tinhmi fianternak nawl a ngei” tiah a ti.

Innchungkhar cu dawtnak hmun a si.

Khrihfa chungkhar cu dawtnak in a khatmi kan si awk a si. Efesa 5:25 ah Paul nih “Vale hna, Khrih nih Khrihfabu a dawt i a caah a nunnak a pek bantukin nan nupile zong nan dawt hna awk a si.” Dawtnak cu Pathian a ṭihzah mi innchungkhar hrampi a si. Pa nih a nupi cu a dawt hrimhrim awk a si, a ti. Nupi nih a va kha a upat hrimhrim awk a si, a ti. Nulepa nih fale kan dawt hna awk a si. Fale nih an nu le an pa kha kan upat hrimhrim hna awk a si. Hi dawtnak hi intuarnak lawng a si lo. Lungsaunak, zaangfahnak, ngaihthiamnak le zawnruahnak ngeih hi nifatin i thim hi a si. Gary Chapman nih “Dawtnak cu chungkhar pehtlaihnak hlawhtlinnak kip hrampi a si” tiah a fainter.

Innchungkhar cu Khrih zultu sernak hmun a si.

Pathian nih nulepa cu fale kha Amah kong cawnpiak dingah rian a pek hna. Deuteronomy 6:6–7 chung ah “Nihin ah kan pekmi hna nawlbia hi nan lung chungah i chiah hna seh law nan fale kha i cinken hna u.” Chungkhar cu sianginn pakhatnak a si. Nulepa cu cawnpiaktu hmasa bik an si. An fale kha thlacam ning, Baibal ca rel ning le thianghlim tein nun ning kha kan cawnpiak hna awk a si. Khrihfabu rian lawng a si lo, chungkhar in aa thawk mi a si. Tedd Tripp nih “Nulepa sinak thinlung cu ngakchia thinlung zohkhenh kha a si, ziaza thlen sawhsawh kha a si lo” tiah a ti.

Chungkhar cu huhphenhnak hmun a si.

Pathian a ṭihmi chungkhar ah, chungtel hna nih taksa le thlarau lei pakhat le pakhat harnak in tikah i huhpheh nak hmuh a si. Khrihfa chungkhar cu fale nih biatak, thiannak le dinfelnak kong an cawn khawhnak hmun him a si. Zumhnak kilvennak hmun a si. Phungthlukbia 14:26 chung ah “Bawipa a ṭihmi cu a fekmi ralhruang an ngei i an fale caah dornak hmun a si.” Nulepa nih kan fale kha media ṭhalo, hawikom ṭhalo le cawnpiaknak hmaan lo ti bantuk ṭhaṭlonak hna in chungkhar in kan huhphenh hna awk a si. Tony Evans nih, “Khrihfa chungkhar cu Pathian bia ningin i huhphenhnak, le lamhruainak a hmun a si” tiah a ti.

Innchungkhar cu Pathian biaknak hmun a si.

Khrihfa chungkhar cu thlacamnak le Pathian biaknak hmun a si awk a si. Lamkaltu 10 chungah Pathian a ṭihmi le a innchungkhar dihlak zumhnak in a hruaimi Kornelias kong kan hmuh. Zarhpi ni ah biakinn chung lawng ah si loin chungkhar ah Pathian biak hi nifatin tein tuah a herh. Chungkhar thlacamnak, hmunkhat ah Baibal rel ṭinak, thangṭhatnak hla saknak hna nih hin chungkhar pakhat kha Pathian he naihniam tein um khawhnak a bawmh hna. Donald S. Whitney nih “Innchungkhar i Pathian biaknak cu duhthimnak a si lo, nifatin kan thluachuah le kan rian biapi a si” tiah a ti.

Innchungkhar cu vawlei ah Pathian tehte a si.

Jesuh nih Matthai 5:14 ah, “Nannih cu vawlei ceunak nan si, tlang cungah sakmi khua cu aa thup kho lo,” tiah a ti. Khrihfa chungkhar cu muihnak vawlei ah ceunak a si. Pakhat le pakhat kan i dawt i kan i ngaihthiam, Bawipa rian kan ṭuanţinak kha midang nih an hmuh tikah Khrih lei ah an i hmuh ve lai. Kan chungkhar nun nih Jesuh hnu zulh timi sullam kha mi dang a hmuhsak hna awk a si. John Piper nih, “khrihfa chungkhar cu vawlei cung ah Pathian sunparnak thangţhat awk ah ser le dirh a si” tiah a ti.

Innchungkhar vanram caah kan i timhtuahnak hmun a si.

Khrihfa chungkhar cu vanram (zungzal Pathian he) um ţi ding in timhtuahnak hmun a si. Chungkhar ah hin Pathian bia, dawtnak, nawlngaihnak, ngaihthiamnak, rianţuan ning le ţhancho ning kan cawnnak hmun a si. Hi hna hi vancung ram le a muisan an si. Biathlam 19:7 ah, Baibal nih Tuufa ṭhitumhnak kong a chim, cucu Jesuh le a Khrihfabu kha a si. Vawlei khrifa chungkhar hna cu zungzal nunnak pehtlaihnak hmanthlak an si. Francis Chan nih, “Kan innchungkhar hna hi kanmah kong an si lo; a ngan deuhmi thil pakhat, zungzal nunnak kong an si” tiah a ti.

Biadonghnak

Cucaah Khrihfa innchungkhar nih aa tinhmi cu zeidah a si? Pakhat le pakhat i dawt. Kan fale hna kha Pathian ṭihzahnak kong cawnpiak le chimh ding. Pathian biak ţi ding. Pakhat le pakhat i runvennak. Vawlei caah ceunak si ding. Cun vanram caah kan i timhtuahnak hmun si ding. Khrihfa innchungkhar cu a tlingmi a si lailo nain Khrih ah hram a bunhmi a si. Pathian bawmhnak thawngin Amah sunparnak a petu chungkhar fek kan si awk a si. “Keimah le ka innchungkhar nih cun Bawipa rian kan ṭuan lai” timi Joshua bia kha kan chungkhar tinhmi le rian a si ve awk a si. Cucu nihin le zungzal in kan i tinhmi si cio ko seh.

Amen….Amen… Amen.