Pakhat le pakhat i Dawt timi sullam cu zeidah a si?

Dawtnak cu intuarnak lawng si loin a dang zong a si. Action pakhat a si. Jesuh nih Keimah nih kan dawt hna bantuk tein pakhat le pakhat i daw u tiah a kan ti. Cucu nawlpeknak nganpi a si. Jesuh nih a kan dawt i a nunnak a kan pek. A kan ngaihthiam, a kan bawmh, kan phut lo caan zongah a kan zohkhenh.

Pakhat le pakhat kan i dawt tikah, zaangfahnak, lungsaunak le ngaihthiamnak ngeih kha kan i thim awk a si. Pakhat le pakhat kan i zohkhenh, kan i zangfah, zawnruahnak le dawtnak tel buin bia kan chimh awk a si. A har caan zongah khat le khat kan i bawmhnak dawtnak kan langhter hi a biapi ngai. Kan chimmi lawng si loin kan tuahmi thil ah dawtnak a langh awk a si.

1 Johan 4:7 “Ka fale hna, dawtnak hi Pathian sinin a rami a sic aah pakhat le pakhat i daw u sih. Pakhat le khat aa dawmi cu Pathian fa an si i Pathian kha an hngalh.”

Jesuh nih pakhat le pakhat kan i dawt lai tiah zeicah a kan fial?

Jesuh nih hi nawlbia hi ruahnak cheuhnak caah si loin, nawlbia thar a kan pek mi a si. Zeiruang ah? Ti ah cun, dawtnak cu kan zumhnak tehte nganbik pakhat a si. Kannih nih midang kan dawt hna kha an hmuh tikah Jesuh cu kanmah hmangin an hmuh ve tinak a si. Dawtnak nih Khrihfabu cu a thawnter i a lung a rualter. Dawtnak nih lungthin a kuaimi kha a damter. Dawtnak nih cun vawlei cung pi hi a thlen khawh.

C.S. Lewis nih “Na innpa kha na dawt hna maw? ti in na caan dihter hlah, na dawt nak kha langhter. Hi bantuk dawtnakin tuah mi hi an hmuh tik paoh ah, thil lianngan pakhat poh a langhter. Mi pakhatkhat cung ah dawtnak taktak in bawmh tikah, Pathian cu dawtnak a sinak hmual kha a lang.” tiah a ti. Cu dawtnak taktak cu kan thinlung lawng in si loin, kan tuahsernak in aa thawk tawn mi kha a si.

Pakhat le khat i dawt cu zeibantuk indah a thawk?

Pakhat le pakhat i dawt khawhnak ding caah a fawimi lam cheukhat hna cu:

• Lungsau tein um – Midang kha rang tuk in nam lo ding, asiloah fawi tukin kan lung father lo.

• Zaangfahnak nun ngeih – Bia ṭha, bia dawh chim buin i zohkhenhnak langhter.

• Ngaihthiamnak nun ngeih– Thinlung hliamhma kha thlah law hmailei ah kal.

• Hrawmh nun ngeih – Midang bawmh khawhnak ding caah na ngeihmi kha hrawmh siang.

• Nawl ngaih nun ngeih – Midang kha na lungthin dihlak in pe hna.

• Thlacam nun ngeih– Midang zawnruahnak taktak he Pathian sin thlacam piak buin bawmh.

Mother Teresa nih “Kan dihlak in thil lianngan kan tuah kho lai lo. Asinain dawtnak nganpi he thil hme tete cu kan tuah khawh ko lai.” tiah a ti. Dawtnak taktak cu a nganmi si a hau lo. Zeizong vialte cung ah zawnruahnak le zaangfahnak taktak he tuahsernak in langhter tu kha a chim duhmi a si deuh.

A kan dawtu hna dawt ve cu a fawi deuh zungzal.

Mi tampi cu a kan hliam tikah, asiloah kan lung a kan father tikah A kan hliamtu dawt cu a har ngaingai ko. Asinain Jesuh nih misual kan si lio ah a kan dawt kha philh hlah u sih. Kan phu lo in a kan ngaihthiam. Bawi Jesuh nih cu bantuk cun midang cung ah tuah ve dingin a kan fial. Ngaihthiamnak cu dawtnak in langhter khawh kha a biapi tukmi pakhat a si ve. Minung sinakin midang ngaihthiam cu a har tuk nain, Pathian thazaang hmang in ngaithiamtu si i zuam kan herh.

 Dawtnak nih Khrihfabu le Zatlang nunnak a Sersiam .

Khrihfabu pakhat cu dawtnak in a khah tikah, mi dang nih an i ham i an fuh tawn. Chungkhar ah pakhat le pakhat an i dawt tikah daihnak a um. Innpa hna pakhat le pakhat an i dawt tikah, himnak le lawmhnak a um. Dawtnak nih zeizong vialte a ṭhatter dih khawh.

Bible chung ah Khrihfa hmasa ah an i dawt ning in kan rel cio lai ka zumh. An ngeih mi zeizong vialte an i hrawm, an i bawm, zeivan hai an hai lo. Cu bantuk nun cu nihin Khrihfabu zong kan nun ter a si rih awk a si.

Dawtnak nun ah Zeitindah Kan Than Khawh Lai?

Mi tampi he i dawt awkah cun Pathian he naih tein um a hau. Dawtnak cu Thiang Thlarau theitlai a si. Bawi Jesuh he kan nun ti deuh tikah midang he kan dawt deuh kho lai tinak a si. Khrih he nun ṭi khawhnak ding ah tampi chim ding a um ko nain pa 4 in ka chim duh.

1. Thlacam:- Pathian sinah na lungthin kha a dawtnak in khahter dingin hal.

2. Bible rel:- Jesuh nih mi dang cung ah a dawtnak nu a ngeih ning kha cawng.

3. Midang he caan hmanṭi:-  Mah lawng in peu hlah. Hawikon le Khrihfabu ah tel khawh zuam.

4. Dawtnak kha langhter:- Nifatin, mi dang sinah dawtnak langhter khawh i zuam.

Max Lucado nih a chim mi cu, “Pathian nih cun nangmah an dawt tuk, zeitikhmanh ah an kaltak duh lo, a Fapa Jesuh bantuk si ve hna seh ti an duh.”

Dawtnak cu Laksawng nganbik pakhat a si

Korin 13 ah Paul nih tlang ṭhial khawhnak zumhnak kan ngeih ko nain dawtnak kan ngeih lo ahcun zeihmanh kan si lo tiah a ti. Dawtnak cu fimnak, hngalhnak le hlawhtlinnak nakin a biapi deuh. Midang ṭhanchonak caah Kan pek khawhmi laksawng nganbik pakhat cu dawtnak a si.

Nunnak ah zeizong vialte kan uk kho lo, asinain dawtnak kha kan i thim zungzal khawh mi a si. Dawtnak nih lungthin a thlen. Dawtnak nih hlei a ser khawh. Dawtnak nih damnak a chuahpi. Cun dawtnak cu zungzal in a hmun. 1 Korin 13:13 “A hmun zungzalmi thil pathum an um, cu hna cu zumhnak le ruahchannak le dawtnak an si, cu hna lak a ngan bik mi cu dawtnak a si.” ti kan hmuh.

Biadonghnak

Nifatin kan nunnak cio ah dawtnak tam deuh in kan langhter khawh cio nak hnga Pathian sinah bawmh hal hna u sih. Thazaang pek a herhmi hna kha dawtnak lungthin taktak he thazaang pe hna u sih. Kan lung a kan fahtertu an um sual zong ah Pathian sin in a ra mi dawtnak thazaang hmang in le Khrih nih a kan ngaihthiam ve bantuk tein i ngaithim cio hna u sih. Pakhat le pakhat kan i dawt ah cun Jesuh nawl kan ngaihmi a sic aah, dawtnak cerhti nung nifatinte kan nunak ah luanter cancin i zuam cio hna ko hna u sih tiah, ka chim duh mi cu a si. Pathian nih a bia thlauchuah ko seh. Amen.