Nguntual Thawng

Hlan lio kan pupa chan i laiphung i an rak um lio ah khuathar an tlak tik ah “Thlacamtu” ah “Tlangbawi” an rak i sawm chih tawn hna. Cun, khua an tlaknak caan a sau ciami nih “Tlangbawi” cu “Mithiang” tiah an ruahmi hna chung in a thiah in an rak thiah tawn hna. A cheu cu kum cu zat ah thlen ṭhan lengmang tibantuk a hmangmi zong an rak um ti a si.

Cu “Tlangbawi” cu “Tlangzam zamthuat, tlangrian awlh” tibantuk an rak serh hna i khuami an herh caan poh ah “Bol, thlacam” tibantuk rian kha an rak ṭuanpiak tawn hna. A tlangpi cun mah vial cu an rian cu a rak si ko. Tlangbawi nihcun Uknak leikap a simi, “Khuabawi, Sangbawi” tibantuk zong kan tlaih chih awk a si ve ko ee; an rak ti bal lo. Cuh khawhnak nawl zong an rak ngei lo. Tu Khrihfa chan i Pastorte rian he a kal ning aa dang lai nain a rian tlangpi cu aa lo ko. Aa khat pah ko.

Baibal cathiang chung ah Jesuh a zultu hna rian an rak ṭuannak ah Judah mi hna le Grik mi hna karlak ah lung i hmuh lonak a rak chuah caah “Lamkaltu 6:2-7” “Lamkaltu pahleihnih hna nih khan zultu dihlak kha an ningpi in an auh hna i, ‘Kannih nih Pathian bia chim kha thlahdorh riangmang i tangka i phawtnak lawng kha kan tuah ahcun a hman hnga lo. Cu caah u le nau hna, nan lak ah Thiang thlarau le fimnak in a khat tiah nan hngalhmi pasarih in thim hna ulaw cu hna cu hi thil a tawlreltu ah kan chiah hna lai. Kannih tu cu tlacam le Pathian bia chim ah khan kan caan cu a dihlak in kan hmang ko lai.’ tiah an ti hna.

Lamkaltu hna nih an chimmi cu an dihlak in an lung a si i cu caah zumhnak le Thiang thlarau in a khatmi Steven, Filip, Prokhoras, Nikanor, Timon, Parmenas le Antiok khuami Jentail mi Nikolas, Judah phung a zulmi kha an thim hna. Cu hna cu lamkaltu hna sin ah khan an hei chuahpi hna i thla an cam piak hna i an lu cung ah an kut an chuan. Cu ticun Pathian bia cu a karh chin lengmang. Jerusalem khua chung ah khan a zummi cu an tam chin lengmang i tlangbawi tampi zong nih cu zumhnak cu an pom ve.” Tiah kan hmuh.

Asinain, nihin ni ahcun Pastor tam u nih an i thawh riangmang i, “Khrihfabu cu Pastor nih kan hruai awk a si. Meeting vialte zong Pastor nih a hruai dih awk a si. Khuakhan lairel vialte zong kanmah nih kan hruai hna awk a si. Khrihfa upa cu kanmah a kan bawmtu lawng an si.” Tibantuk lungput an ngei cang hna.

Cu cu zei he dah aa lawh; ti ahcun, Kawlram ah Ralbawi Zik nih ram uknak an tlaih i “Nawl ngeihnak a thawtnam an theih hnu ah cu an nawl ngeihnak Power cu thlah sian ti loin ngakchia zangtlaih in an i tlaih zungzal tik ah a rum tukmi ram hmenh kha a si a fak bikmi ram i an chuahtermi he hin aa lo. Cu Ralbawi Zik nih an i tlaihmi uknak cu a dik lo; kan hei ti heh tiah kan hei doh. Asinain cu hna nawl cu Biaknak chung lila hmenh ah kanmah lila nih kan i cawn riangmang i Power a dihlak in kanmah nih kan tlaih hin lo ee; kan tlaih dih awk a si ee; kan hei ti rihmi hi cu a dik lomi thil ah ka hmuh.

Khrihfabu hi a thawk ning aa lo cio lo. A cheu cu Pastor nih a hram a domh i a cheu cu Layman nih a hram an domh hnu ah Pastor an lak hna. Zei ti a si zong ah, “Pathian sin chanh hnu lawng ah hramdomh dih a si ko caah Khrihfabu a ngeitu le a hruaitu taktak cu Thiang thlarau kha a si ko.”

Khrihfabu a ngan a damnak hnga, a fehfuannak hnga le a ṭhanchonak hnga caah cun Pastor nih amah rian a simi Thlacam, Pathian bia cawnpiak i karhter, a tlaumi kawl, ngaih a chiami hna va hnemh, lung aa lawmmi hna va lawmhpi ve; timi a rian kha a caan dihlak pek in a ṭuan awk a si bantuk in Khrihfa upa zong nih Khrihfabu i a herhmi thil dang khuakhan lairel vialte kha tawlrel in Pastorte kha a bawmh hna awk kha a si ve ko. Pastor nih zei dang khuakhan lairel le hruainak lei rian kha aa khinh dih a si ahcun a rianpi a simi Thlacam, Patian bia cawnpiak i thlarau in khahter le mizaw thlacamh, ngaihchiami va hnemh le lunglawmmi va lawmhpi rian vialte cu a tlolh dih lai va si kaw cu a biapi bikmi rian cu tah a ho nih dah an ṭuan kun hnga.

Cun, Pastor cu a thianhlim awk hrimhrim a si. Khrihfabu chung ah miduhdanh le mithleidan a ngeih hrimhrim awk a si lo i mi mithmai zong a zoh awk a si lo, Pathian mithmai lawnglawng an zoh awk a si. “Nawl ngeihnak” timi cu thleidannak, duhdanhnak (Bias) he aa ṭhen kho lomi a si. Tahchunhnak ah rian pakhat caah minung pahra nih an sok tik ah an pahra ning in pek awk an ṭha lo i pakhat lawng pek a hau hnga. Cu tik ah rian an pekmi pakhat cu aa lawm ko lai nain pek lomi pakua cu an ngaih a chia kho. Cu tik ah nawl ngeitu cung ah an lung zong a fak kho. Cu bantuk a si caah, Pastor nih Nawl ngeihnak aa tlaih a si ahcun, a thianghlim kho ti lo. Mah ca hrimhrim ahcun Pastor nih Nawl ngeihnak rian cu Layman nih khinh len hmenh hna sehlaw amah himhrim nih a duh awk khi a si hnga lo.

Cu caah zei ee cu ee kha ee ti len loin, Pastor nih Pastor rian a simi te kha thianghlim tein, ding tein le fel tein a ṭuan i a turuun a simi a Khrihfabu chungtel hna kha keh le orh i an pial sualnak hnga lo a zohkhenh hna awk kha a si ko, Khrihfa upa zong nih Khrihfabu rian te kha a herh ning tein le Pastor te nih anmah rian te kha lunglawm thanuam te i an ṭuan khawhnak hnga caah Pastor he i bawm in ding le fel tein ṭuan ve ko hna sehlaw cuti cun chungkhar ca i nu le pa bantuk in Khrihfabu chung ah Nu dirhmun le Pa dirhmun in ṭuan ṭi lulhmalh ahcun chungtel vialte zong an i lawm, an i nuam lai i Thiang thlarau in an khat chinchin hna lai, an ṭhangcho thluahmah lai. Cun, amah Pathian pennak zong a karh chin luaimai ve lai.