Zeiruang ah Mission Rian Kan Ṭuan? Matt 28:19-20

Khrihfa zumtu nih mission rian kan ṭuan cu, Jesuh Khrih nih miphun vialte kha amah zultu ser rian akan chiahtak mi a si lawng si loin, amah kan zumhnak, a nawl kan ngaihnak le kan dawtvenak langhter nak hrampi zong a si, ti chim hmaisa ka duh.

Khrihfabu sining nih a langhter mi pakhat cu mission rian hi Pathian sining hrimhrim ah hram aa bunh mi a sinak kha a si. Pathian cu thlahtu Pathian a si. A hramthawk lei or Bibla ca hlun ah hin Pathian nih profet a thlah hna i, a donghnak lei or Bibla ca that ah, vawlei tlanhnak caah a Fapa Jesuh Khrih kha a thlah (John 3:16-17).

Jesuh Khrih nih, vancung a kai hlanah, “Cucaah va kal u law miphun vialte kha ka zultu ah va ser hna u” (Matthai 28:19) tiah azultu kha rian nganpi a pek hna. Hi nawlpeknak hi duhthimnak a si lo, Khrihfa nunnak le sining ah phawih khawhlo in aa seh chih, aa bunh chih mi hrampi a si.

Baibal ning in chim ahcun mission cu Khrih thawngţha chim a si leng ah, sifak zohkhenhnak, mizaw hramhnak le thongtla bawmh hna kha aa tel (Luka 4:18-19). Hlan lio Khrihfa zumtu nih hin, hi lam kha an zulh, Lamkaltu 2:44-47 ah kan hmuh bantuk in thawngṭha lawng si loin, an ngeih mi thilri pawl kha an i hrawm, ti kan hmuh.

Mission rianṭuannak nih vawlei cung ah Pathian pennak langhtertu le tluntertu awk ah minung kha Pathian he pehtlaihnak a ngeihter hna. Thiang Thlarau nih minung kha a thlen hna. Missiologist David Bosch nih Transforming Mission, cauk ah a ţial mi cu “mission is the Church’s response to the call of God’s love for the world.”[1]  mission cu Khrihfabu nih vawlei cungah Pathian dawtnak le auhnak a lehnak rian a si, tiah a tial.

Cun, Christopher Wright zong nih, The Mission of God cauk ah, a ṭial mi cu “the entire Bible is a “missional narrative” revealing God’s plan to bless the nations through His people.” [2] Baibal chung bia dihlak hi “mission rianṭuannak tuanbia” a si ti khawh a si i, Pathian nih a mi hna hmang in miphun vialte hna thluachuah pek a timhmi a phuannak tuanbia a si, tiah a ti.

Lesslie Newbigin nih, The Open Secret cauk ah, a ţial mi cu “mission is not just about saving souls but revealing Christ as Lord over all creation.”[1] Mission rianṭuannak cu thlarau khamhnak lawng si loin, sermi thil vialte cungah Khrih cu Bawi a si ti langhternak le chim kha a si tiah a langhter.

Nihin ah Chin Khrhfabu hna nih Mission rian kan ṭuan tikah hin thukpi le kaupi in ruat ceomau in Khrih cu Bawi bik a sinak thawngţha hi Khrihfabu nih a hmaithlak mi rian kip ah a langh ding hi a biapi ngai mi pakhat a si. Zumtu pakhat hrimhrim kan i philhlo ding ah a biapi mi cu sertu Pathian nih amah aiawh in vawlei ceutertu ah a kan thlah ti hi a si. (believer is representing creator God).

Cucaah Khrihfabu nih mission rian a ṭuannak a ruang Khrih zultu ser rian a si. Pathian le innpa dawt rian ṭuan a si. Mission rianṭuannak nih a fainter mi pakhat cu, khrihfabu nih Khrih pum le sining aa nunpi mi kha, vawlei cung ah Khrih khamhnak le Khrih nih pekmi ruahchannak thawngṭha biatak i put le au pi a si, ti kha chim ka duh mi a si.

Mission rian cu Pathian nih a thawk. A Fapa a kan peknak in. Fapa Jesuh nih Pa Pathian thawk mi rian cu a ṭuan peh. Fapa Khrih van cung a kai lai ah a zultu hna kha, miphun vialte kha ka zultu ah ser hna u, tiah rian a pek tak hna. Kan nih zumtu vialte zong cu rian cu duh thim si loin, khinh dih kan si ve. Khrih zumtu nih, Khrih nih chiahtak mi mission rian ţuanlo awk ah a sithiamlo mi a si.

Nihin kan dir hmun ah hin, khrihfa chungkhar kan si ka ti ko nain, kan fale hna nih sertu Pathian theihlo khawh an si caah fale sining thlingthlak ngai a hau, fale, chungkhar nun thlingthlak kha mission rianţuan pakhat ah kan i ruah ding a si. Midang ca le mizaw, mifak si hna seh, hawikom siaherh deuh hna caah, kan innpa hna caah le miphun le ram caah thla kan cam zong hi mission rian kan ţuan tiah i ruah chih buin lungdong lo tein thla kan cam piak ve hna awk a si.

Inn chungkhar ah, Nu le Pa hna nih fale hna he Bible rel ţinak, Pathian thangţhatnak hla sak le thlacam ţinak hna hi Khrih fialmi mission rian nganpi ah i ruah in le caan sersiam buin hi rian hi kan nun chung vialte kan ţuan ding ah Khrih nih a kan fial mi a si. Cucaah, kan ngol lo ah cun, Thiang Thla Rau bawmhnak thawngin a theipar kan zum caan a phan te ko lai. Thiang Thla Rau bawmh hal buin, Khrih zultu ser hi mission rian ṭuan chan pakhat cu a si. Amen.